Túrkııada qonaqúıdegi órtte bir otbasynan 14 adam qaza tapty: Erdoǵan kóńil aıtty
ASTANA. KAZINFORM — Túrkııa prezıdenti Rejep Taıyp Erdoǵan Bolý qalasyndaǵy Kartalkaıa taý-shańǵysy kýrortynda órtten qaza tapqan Gıýltekın otbasyn jerleý rásimine qatysty, dep habarlaıdy Kazinform menshikti tilshisi.
Rásim Bolý ortalyq meshitinde ótti. Erdoǵan qaıǵylaryna ortaqtasyp, qaza bolǵan marqumdar úshin duǵa jasady.
— Alla Taǵala olarǵa meıirimdilik tanytsa eken dep duǵa etemin. Olardyń rýhtary sheıitterdiń rýhymen birlikte bolady dep senemin. Júregimiz bos, qaıǵymyz úlken. Jatqan jeri jánnatta bolsyn, — dedi Erdoǵan.
Qaıǵyly oqıǵa túnde 12 qabatty qonaqúıde bolǵan. Ol kezde ǵımaratta 238 adam bolǵan edi. Oqıǵa saldarynan 76 adam qaza taýyp, 51 adam túrli dárejedegi jaraqattarmen aýrýhanaǵa jetkizildi.
Qaza tapqandar arasynda Túrik áýe jelileriniń qyzmetkeri Zehra Sena Gıýltekın, onyń kúıeýi, úsh balasy jáne Kartalkaıaǵa qysqy demalysqa kelgen taǵy toǵyz týysy bar.
Belgili bolǵandaı, órt kezinde Zehra Sena anasyna habarlasyp, keshirim men bata surap úlgergen. Otbasy órtke oranǵan ǵımarattan shyǵa almady.
Oqıǵaǵa baılanysty tergeý amaldary júrip jatyr. Qaıǵyly oqıǵanyń sebepteri men mán-jaıyn anyqtaý úshin toǵyz adam ustaldy, olardyń arasynda qonaqúı qyzmetkerleri bar.
Bul qaıǵyly oqıǵa búkil Túrkııany jáne basqa elderde qaıǵy men kóńil tolqynyn týdyrdy. Túrkııa prezıdenti tipti qaza tapqandarmen qoshtasý rásiminde jylap jiberdi.
Eske salsaq, Memleket basshysy Túrkııa Prezıdentine kóńil aıtý jedelhatyn joldady.
Sonymen qatar, Memleket basshysy Qazaqstan halqynyń jáne óziniń atynan Túrkııa Prezıdenti Rejep Taıyp Erdoǵan men jaqyndarynan aıyrylǵan otbasylarǵa, sondaı-aq baýyrlas túrik halqyna kóńil aıtyp, zardap shekkenderdiń tez arada saýyǵyp ketýine tilektestik bildirdi.