Túrkııada qonaq úıdegi órt isi boıynsha 11 adam ómir boıyna bas bostandyǵynan aıyryldy

ASTANA. KAZINFORM – Túrkııada Kartalkaıa taý shańǵysy kýrortyndaǵy Grand Kartal qonaq úıinde bolǵan órt isi boıynsha úkim shyǵaryldy, dep habarlaıdy Kazinform agenttiginiń menshikti tilshisi.

Osy jyldyń basynda Túrkııanyń Bolý provıntsııasyndaǵy Grand Kartal qonaq úıindegi órtten 78 adam qaza tapqany belgili boldy, olardyń basym bóligi balalar. Órt kezinde qonaq úıde barlyǵy 238 adam bolǵan. Olardyń 130-dan astamy zardap shekti.

Uzaq tergeýden keıin Bolý provıntsııasynyń asa aýyr qylmys boıynsha birinshi soty11 adamdy kináli dep taýyp, olardy ómir boıyna bas bostandyǵynan aıyrýǵa úkim shyǵardy. Bul rette sot qandaı da bir jeńildetetin mán-jaılardy qoldanýdan bas tartty jáne jaza merzimi boıynsha eshqandaı jeńildik jasaǵan joq.

Sottalǵandardyń arasynda qonaq úı ıesi Halıt Ergıýldiń ózi, onyń jubaıy Emıne Ergıýl, olardyń qyzdary Elıf Aras jáne Djeıda Hadjıbekıroglý, qonaq úı ıesiniń kúıeý balasy Emır Aras, qonaq úı basqarýshysy Zekı Iylmaz jáne Gazelle qonaq úıiniń bas menedjeri Ahmet Demır bar. Olar órtten qaza tapqan 34 bala men 44 eresek adamnyń ólimine kináli dep tanyldy.

Tergeý barysynda 32 aıyptalýshynyń 19-y qamaýda boldy, qalǵandary eshqaıda ketpeý týraly qolhat jazdy. Úkim jarııalanǵannan keıin buryn bostandyqta bolǵan eki adam sot zalynda qamaýǵa alyndy.

Sońǵy tyńdaýda sottalýshylar bolǵan oqıǵa úshin jaýap bermeıtinin jáne órt jazataıym oqıǵanyń saldarynan bolǵanyn aıtyp, barlyq aıyptaýdy joqqa shyǵardy.

Biraq sot bul qaıǵyly oqıǵa órt qaýipsizdigi erejelerin óreskel buzýdyń jáne ondaǵan azamattyń ólimine ákep soqtyrǵan qonaq úı basshylyǵynyń nemquraılylyǵynyń nátıjesi dep sanady.

Sottyń bul sheshimi Túrkııadaǵy adamdardyń jappaı ólimine, sonyń ishinde qaýipsizdik erejelerin buzýǵa baılanysty isterge qatysty eń qatań úkimderdiń biri boldy.

Buǵan deıin osy jyldyń 21 qańtarynda Túrkııanyń Bolý provıntsııasyndaǵy Kartalkaıa taý shańǵy kýrortyndaǵy qonaqúıde iri órt shyqqanyn jazǵan bolatynbyz.

Keıinirek Túrkııadaǵy Grand Kartal qonaq úıindegi órttiń naqty sebebi belgili boldy.

Tergeýdiń negizgi kezeńderi aıaqtalǵannan keıin 13 kúdiktige 1 998 jylǵa bas bostandyǵynan aıyrý qaýpi tóndi.

Túrkııa prezıdenti Rejep Taıyp Erdoǵan Bolý qalasyndaǵy Kartalkaıa taý-shańǵysy kýrortynda órtten qaza tapqan Gıýltekın otbasyn jerleý rásimine qatysty.

Memleket basshysy Túrkııa Prezıdentine kóńil aıtý jedelhatyn joldady.

Túrkııa Bolý tragedııasynan keıin aza tutý kúnin jarııalady.