Túrkııada kólik qaqqan qazaqstandyqtyń hali belgili boldy

ASTANA. QazAqparat - Túrkııanyń Antalııa qalasynda jaıaý júrginshiler jolynda avtokólik qaǵyp ketken 21 jastaǵy Temirtaý qalasynyń turǵyny esin jıdy. Bul jaıynda QR SІM baspasóz qyzmetiniń jetekshisi Ánýar Jaınaqov aıtty, dep habarlaıdy QazAqparat.

«Keshe ol esin jıdy. Qazirgi ýaqytta ápkesimen sóılesip úlgerdi, tanydy. Al bul jaqsy belgi. Degenmen, ol áli de bolsa belgili bir ýaqyt reanımatsııada bolady. Konsýlymyz onyń ápkesimen, dárigerlermen, polıtsııamen únemi baılanysqa shyǵyp otyr», - dedi ol.

Onyń aıtýynsha, qazirgi ýaqytta qazaqstandyq dıplomattar aldyna kóliktiń rýlinde bolǵan Túrkııa azamatyn kináli dep taný jáne saqtandyrý kompanııasynan tólem alý maqsatyn qoıyp otyr. Saqtandyrý kompanııasynyń ótemaqysy Qazaqstan azamatshasynyń aýrýhanadaǵy shyǵyndaryn óteýge jumsalatyn bolady.

«Emdeýge kúnine shamamen 3-3,5 myń dollar ketedi. Qazaqstandyqtyń saqtandyrýy ary ketkende 13-14 myń dollarǵa eseptelingen. Osy kúnniń ózinde atalǵan lımıt bitýge jaqyn. Sot barysynda biz jol apatyna kináli resmı aıypty dep tanylady jáne onyń saqtandyrý kompanııasy azamatshamyzdyń túrik klınıkasyndaǵy shyǵyndaryn óteı bastaıdy dep úmit artyp otyrmyz», - dedi Jaınaqov.