Túrkııada kólik apatyna ushyraǵan qazaqstandyq óziniń jaǵdaıyn aıtyp berdi
Sáýleniń qazirgi bar tilegi balasynyń elge aman oralýy. Ol naýqas balalardyń Qazaqstanda barlyq qajetti em-dom alatynyna senimdi. Onyń aıtýynsha, qyzynyń qazirgi jaǵdaıy birqalypty bolǵanymen olarǵa tek aýrýdy jeńildetetin dárilerdi berip jatyr.
«Qan qysymym birese kóterilip, birese túsip ózim de aýyryńqyrap turmyn. Balalar aman-esen elge oralyp, osy ózimizdiń elden kerekti em-domyn alsa, soǵan qýanar edik. Qazir olarǵa naqty em jasap jatqan joq. Tek aýrýlaryn jeńildetip jatyr. Bar tilegim, qyzym aıaǵynan turyp, qataryna qosylsa deımin. Eshkimniń basyna mundaı jaǵdaı bermesin», - deıdi Sáýle Saǵyndyqova.
Al sol jantúrshigerlik apatqa ushyraǵan Batyrhan Qaıyrbaev qazir Taldyqorǵanda. Ol da dostarynyń elge aman-esen jetýin tilep, alańdap otyr.
«Búgin men dostarymmen habarlasa almadym. Barlyq jańalyqty ınternet betterinen bilip otyrmyn. Men sol kólik apaty bolǵannan keıin Qazaqstanǵa oralǵan úsh balanyń birimin. Elge oralýyma anam kómektesti. Keri qaıtýyma aqsha jiberdi. Al kólik apaty bolǵanda men mashınanyń artqy jaǵynda otyrdym, shynymen qudaı saqtady. Qazirgi jaǵdaıym jaqsy», deıdi Batyrhan Qaıyrbaev.
Esterińizge sala keteıik, 21-qyrkúıekte Túrkııanyń Kemer qalasy mańynda bolǵan jol apaty saldarynan 7 qazaqstandyq aýrýhanaǵa túsken edi. Der kezinde kórsetilgen medıtsınalyq kómek pen hırýrgııalyq ota jastardyń janyn saqtap qaldy. Sondaı-aq buǵan deıin Túrkııada jol apatynan zardap shekken tórt qazaqstandyq búgin Almatyǵa azamattyq avıatsııamen ushyp keletin habarlaǵan bolatynbyz.
