Túrkııada Qytaıdan ákelinetin kólikterge salynatyn baj salyǵy 40 paıyzǵa ósedi

ASTANA. KAZINFORM – Bıylǵy jyldyń 7 shildesinen bastap Túrkııada Qytaıdan ákelinetin barlyq kólikterge kedendik baj salyǵy 40 paıyzǵa ósedi. Túrkııa basshysy Rejep Taııp Erdoǵannyń tıisti ókimi úkimettik «Resmi Gazete» gazetinde jarııalandy.

Túrkııa bıligi Qytaıdan keletin daıyn kólikterge qorǵanys bajdaryn engizý týraly sheshim qabyldady. Kelesi aıda qytaılyq kólikterge ımporttyq baj salyǵy 40%-ǵa artyp, eń tómengi alym bir kólik úshin 7 myń dollardy quraıdy.

Sońǵy birneshe jylda qytaılyq avtokólik brendteri túrik avtomobıl naryǵynda belsendi túrde tanymal boldy. Osy jyldyń qańtar-sáýir aralyǵynda Túrkııada aspanasty eliniń 30 myńǵa jýyq jańa jolaýshylar jáne jeńil kommertsııalyq kóligi satyldy. Jalpy, olardyń úlesi eldiń jalpy avtokólik naryǵynyń 7,8 paıyzyn qurady.

10% bastapqy baj salyǵyn qosa alǵanda adamdar Qytaıdan ákelingen árbir kólik úshin ortasha eseppen 50% salyq tóleıtin bolady. Buryn 40 paıyzdyq ústemaqy tek elektromobılderge ǵana qoldanylǵan.