Túrkııada kıbertyńshylyq jasady degen kúdikpen 5 adam ustaldy
ASTANA. KAZINFORM — Túrkııada kıbertyńshylyq jasady degen kúdikke ilingen bes adam ustaldy. Qazir bul iske qatysty tergeý júrgizilip jatyr, dep habarlaıdy Kazinform agenttiginiń Ankaradaǵy menshikti tilshisi.
Túrkııanyń Ulttyq barlaý uıymynyń úılestirýimen Kıberqaýipsizdik basqarmasy men Jandarmerııa Bas qolbasshylyǵy birlesken operatsııa ótkizdi. Nysanaǵa Ankarada ornalasqan, kásipodaqtarǵa baǵdarlamalyq qyzmet kórsetetin «Aydo Yazılım» kompanııasy alyndy.
Ustalǵandardyń arasynda kompanııa basshysy men qyzmetkerleri de bar. Tintý kezinde olardyń úıleri men keńselerinen kompıýterler, uıaly telefondar jáne basqa da tsıfrlyq qurylǵylar tárkilendi.
Tergeý málimetterine sáıkes, kompanııa ázirlegen keıbir kásipodaq baǵdarlamalaryna arnaıy ınterfeıs engizilgen. Ol kásipodaqqa múshe emes tulǵalar týraly málimetterdi alýǵa múmkindik bergen. Júıe arqyly azamattyń sáıkestendirý nómirin engizip, onyń jeke jáne tirkeý derekterin alýǵa bolǵan.
Tergeý barysynda derekter bazasynan 18 jasqa tolmaǵan tulǵalar týraly málimetter de tabylǵan. Serverlerde «NVİ» belgisiniń qoldanylǵany anyqtaldy. Bul aqparattyń Halyq jáne azamattyq máseleleri jónindegi basqarma júıelerinen alynǵany týraly túsinik bergen. Alaıda tehnıkalyq tekseris mundaı aqparattyń memlekettik júıelerden tikeleı alynbaǵanyn kórsetti.
Anyqtalǵandaı, kompanııa Clock& Wise brendimen uıymdarǵa Túrkııa zańnamasyna sáıkes derbes derekterdi qorǵaý máseleleri boıynsha konsýltatsııalyq qyzmet kórsetken. Qazirgi ýaqytta bul júıeni qandaı kásipodaqtardyń paıdalanǵany jáne alynǵan derekterdiń qandaı maqsatta óńdelgeni anyqtalyp jatyr. Tárkilengen tsıfrlyq materıaldardy taldaý nátıjesine qaraı tergeý aýqymy keńeıýi múmkin.
Buǵan deıin Túrkııada ınternettegi qylmystyq toptarǵa qarsy arnaıy operatsııa bastalǵany habarlanǵan bolatyn.
Aqzat Jıenalına
