Túrkııada kıberqylmyspen kúres kúsheıdi: 350 kúdikti ustaldy

ASTANA. KAZINFORM — Túrkııa Іshki ister mınıstrligi kıberqylmyspen kúres aıasynda eldiń 28 provıntsııasynda iri arnaıy operatsııa ótkizilgenin habarlady, dep jazady Kazinform agenttiginiń menshikti tilshisi.

Mınıstrlik kıberqylmystyq toptardyń qyzmetin toqtatý maqsatynda birqatar aýqymdy operatsııalardyń aıaqtalǵanyn málimdedi. Tekserý sharalary 28 provıntsııada bir ýaqytta júrgizilip, zańsyz bás tigý uıymdastyrý, balalar pornografııasyn taratý, qylmystyq qaýymdastyq qurý jáne qylmystyq jolmen alynǵan kiristerdi jylystatý sııaqty ártúrli qylmystyq áreketterdi qamtydy.

Jalpy eseppen 350 adam ustaldy. Mınıstrliktiń dereginshe, 140 kúdikti sot sheshimimen qamaýǵa alynǵan, al 52 adamǵa sot baqylaýy sharalary qoldanylǵan. Qalǵan fıgýranttarǵa qatysty tergeý áreketteri áli de júrgizilip jatyr.

Tergeý barysynda quqyq qorǵaý organdary aıtarlyqtaı kólemdegi qolma-qol aqshany, ártúrli tıptegi qarý-jaraq pen oq-dárilerdi, esirtki zattaryn jáne zańsyz áreketterdi dáleldeıtin dep boljanatyn kóptegen sandyq materıaldardy tárkilegen.

Tergeýshiler qylmystyq shemalardyń qarjylyq quramyna erekshe nazar aýdardy. Kiristerdi jylystatý derekteri boıynsha kúdiktilerdiń aktıvteri qamaýǵa alyndy: eki kompanııa, 10 jyljymaıtyn múlik nysany, 18 avtokólik jáne banktik esepshottar. Bloktalǵan qarajattyń jalpy somasy 6,5 mıllıon AQSh dollarynan asady.

Іshki ister mınıstrligi kıberqylmyspen kúres operatsııalary jalǵasatynyn jáne Túrkııada uıymdasqan qylmystyq toptardyń qyzmetin anyqtaý men toqtatý jumystary negizgi basym baǵyt bolyp qala beretinin atap ótti.

Buǵan deıin Stambýl prokýratýrasynyń úılestirýimen narkobızneske qarsy iri arnaıy operatsııa júrgizilgeni habarlanǵan bolatyn.

Eske sala keteıik, buǵan deıin Túrkııada esirtkige qarsy operatsııalar júrgizilip, júzdegen adam ustalǵan bolatyn.