Túrkııada kıberqylmysqa qarsy aýqymdy reıd júrip, 360 kúdikti ustaldy

ASTANA. KAZINFORM —  Túrkııanyń 24 provıntsııasynda polıtsııa kıberqylmysqa qarsy aýqymdy operatsııa júrgizdi, dep habarlaıdy Kazinform agenttiginiń Ankaradaǵy menshikti tilshisi. 

Túrkııa Іshki ister mınıstrliginiń málimetinshe, reıd sońǵy on kún ishinde ótkizilgen.

Operatsııa ınternet arqyly balalar pornografııasyn taratý, onlaın álimjettik jasaý, zańsyz bás tigý jáne alaıaqtyq qylmystarǵa qarsy baǵyttalǵan.

Jalpy sany 360 kúdikti ustaldy. Sot olardyń 162-sin qamaýǵa alý týraly sheshim qabyldady, taǵy 125 adam sot baqylaýymen bosatyldy. Qalǵan kúdiktilerge qatysty protsessýaldyq áreketter jalǵasyp jatyr.

Tergeý derekterine sáıkes, kúdiktiler balalar pornografııasy bar materıaldardy saqtaǵan, «POS-ósimqorlyq» dep atalatyn zańsyz qarjylyq shemalarmen aınalysqan, sondaı-aq paıdalanýshylardyń jeke derekterin taratyp, suratqan. Sonymen qatar olar áleýmettik jeliler men fıshıngtik saıttardy alaıaqtyq maqsatta paıdalanǵan. Máselen, taýar satý nemese ınvestıtsııalyq jobalarǵa qatystyrý degen jeleýmen adamdardy aldaǵan.

Tergeý barysynda qylmyskerler azamattardyń mobıldi bankıng qosymshalary men oıyn akkaýnttaryna zańsyz qol jetkizgeni anyqtaldy. Sondaı-aq olar zańsyz onlaın-qumar oıyndar men bás tigýdi uıymdastyryp, qarajatty zańsyz býkmekerlik saıttarǵa aýdarý kezinde deldal bolǵan jáne olardyń jarnamasymen aınalysqan.

Buǵan deıin Túrkııada kıberqylmysqa qarsy kúres aıasynda eldiń 28 provıntsııasynda iri arnaıy operatsııa júrgizilgeni habarlanǵan edi.