Túrkııada keshe bolǵan jer silkinisinen kóz jumǵandar sany ósti
Antakııa qalasynda turǵyn úılerdiń biriniń qırandylary astynan bir adam qutqaryldy, sondaı-aq úsh adamnyń denesi shyǵaryldy.
Dúısenbi kúni keshke Gazı oramyndaǵy turǵyn úı jerasty dúmpýiniń áserinen opyrylyp qulady. Úıindi astynda 4 adam qaldy. Olar 6 aqpanda epıtsentri Qahramanmarashta bolǵan jer silkinisi kezinde zardap shekken ǵımarattardan zattardy tasymaldaýmen aınalysqan jeke kólik kompanııasynyń qyzmetkerleri.
Oqıǵa ornyna eldiń ishki ister mınıstri Súleıman Soılý keldi. Kompanııa qyzmetkerleriniń biri Savash Djýneıdıoglý qutqaryldy. Úıindi astynan taǵy úsh adam – Server men Hýseın Djýneıdoglý, Mısbah Hallaktyń deneleri shyǵaryldy. Kólik kompanııasynyń qyzmetkeri Salman Hallak Anadoly agenttigine jer silkinisi kezinde jumysshylar ǵımarattan zattardy shyǵaryp jatqanyn aıtty. Ǵımaratta izdestirý-qutqarý jumystary aıaqtaldy. Jaralanǵan 294 adamnyń 18-iniń jaǵdaıy aýyr.
Eske salaıyq, 20 aqpanda Túrkııanyń Hataı provıntsııasynyń Defne aýdanynda magnıtýdasy 6,4 bolǵan jer silkinisi tirkeldi. Keıin 5,8 baldyq taǵy bir jer silkinisi boldy. Túrkııanyń ońtústik-shyǵysynda úıler opyrylyp qulady. Jerasty dúmpýleri Sırııa, Lıvan, Kıpr, Izraıl, Iordanııa, Irak, Palestınada da sezildi.
Túrik bıligi teńiz deńgeıiniń kóterilý qaýpi bar ekenin málimdep, keıin tsýnamı yqtımaldyǵyn joqqa shyǵardy. BAQ Sırııadaǵy jańa jer silkinisinen bes adam qurban bolǵanyn habarlady.
Túrkııada 6 aqpan kúni bolǵan zilzala saldarynan qaza bolǵandar sany 41 myńnan asty.
Foto: Anadoly Agenttigi
