Túrkııada KAZNEX INVEST ókildigi ashyldy

ASTANA. QazAqparat - Ystambulda Qazaqstannyń Investıtsııalar jáne damý mınıstrliginiń «KAZNEX INVEST» eksport jáne ınvestıtsııalar boıynsha ulttyq agenttigi» AQ ókildigi akkredıtteldi. Túrkııadaǵy atalǵan qurylymnyń arnaıy ókili bolyp Nurıddın Amanqul taǵaıyndaldy.

Túrkııadaǵy Qazaqstan Elshiliginiń baspasóz qyzmetinen habarlaǵandaı, atalǵan taǵaıyndaýǵa baılanysty Túrkııadaǵy QR Tótenshe jáne Ókiletti Elshisi Janseıit Túımebaev N.Amanqulmen kezdesý ótkizdi. N.Amanqul óziniń mindeti qazaqstandyq ekonomıkanyń basym baǵyttaryna tikeleı ınvestıtsııalar tartý úshin jergilikti kompanııalarmen jumystardy uıymdastyrý ekenin aıtty.

Áńgime barysynda elshi «KAZNEX INVEST» ókiliniń nazaryn sońǵy jyldary elshiliktiń atalǵan baǵyttaǵy júrgizgen jumystaryn saraptaý arqyly atalǵan máseleni  zertteýge aýdartty. Oǵan Elshiliktiń qoldaýymen jergilikti bıznesmendermen baılanys ornatý maqsatynda Qazaqstannyń kompanııalary men óńirlik ákimdik ókilderiniń saparlary boıynsha málimetterdi jınaý usynyldy.