Túrkııada Qazaqstannyń 34 áskerı qyzmetshisi bilim alýda
«Bul baǵyttaǵy sharalar aqysyz negizde júrgiziledi. Barlyq shyǵyndardy qabyldaýshy tarap ózine alady. Eger de Túrkııa jaǵy bólgen kvota boıynsha ekijaqty yntymaqtastyq aıasynda oqytsaq, onda barlyq shyǵyndardy túrikter óteıdi. Sonymen qatar, Túrkııa kýrsanttaryn biz oqytsaq, onda oqytý pen tuǵylyq jerine qatysty shyǵyndardy Qazaqstan jaǵy óz moınyna alady», - dedi T. Dándibaev Senatta tilshiler saýalyna jaýap bere otyryp.
Osy oraıda ol búginde Qazaqstanda áskerı oqý oryndary qamtymaǵan birqatar mamandyqtar bar ekenin atap ótti.
«Bul turǵyda teńiz isi salasyndaǵy mamandar, qurlyqtaǵy áskerdiń keıbir mamandary, ıaǵnı elimizde daıyndalmaı júrgen tapshy mamandyqtardy oqytady. Biz qajetti mamandardy seriktesterimizde oqytýǵa tyrysýdamyz. Osy oraıda Túrkııa biz úshin negizgi seriktestirdiń biri bolyp otyr», - dedi Qorǵanys mınıstriniń orynbasary.
Bıyl Túrkııaǵa mamandar kıberqaýipsizdik boıynsha magıstratýrada oqýǵa jiberilgen. Sonymen qatar, áskerı-teńiz kúshterine, qurlyq áskerleri, avıatsııaǵa qatysty qyzmetshiler baǵyttalyp keledi.
«Bıyl Túrkııada 34 áskerı qyzmetshi bilim alyp jatyr. Olardyń jıyrmasy kýrsant, 14-i ofıtser. Ofıtserler áskerı akademııalarda oqytylýda», - dep naqtylady ol.
Belgili bolǵandaı, aǵymdaǵy jyly Túrkııa alǵash ret Qazaqstandaǵy joǵary oqý oryndaryna áskerılerin biliktiligin jetildirýge jibergen. 16 áskerı qyzmetshi Ulttyq qorǵanys ýnıversıtetinde bilim alýda.
Budan buryn habarlanǵandaı, búgin QR Parlamenti Senaty Halyqaralyq qatynastar, qorǵanys jáne qaýipsizdik komıtetiniń keńeıtilgen otyrysynda «Qazaqstan Úkimeti men Túrkııa Úkimeti arasyndaǵy áskerı yntymaqtastyq týraly kelisimdi ratıfıkatsııalaý týraly» zań jobasy qaraldy.
Kelisim áskerı daıarlyq pen oqytýdy qosa alǵanda, budan buryn qamtylmaǵan birlesken oqý-jattyǵýlardy ótkizý, áýe keńistigi arqyly áskerı múliktiń tranzıti, medıtsınalyq kómek kórsetý, zań quzyrettiligi, sondaı-aq basqa da máselelerdi kózdeıdi.