Túrkııada Qazaqstannyń Aral mańy ekojúıelerin qalpyna keltirý tájirıbesi tanystyryldy
ASTANA. KAZINFORM — Túrkııanyń Antalıa qalasynda BUU-nyń Klımattyń ózgerýi týraly negizdemelik konventsııasy Taraptarynyń 31-konferentsııasy (COP31) aıasynda QR Ekologııa jáne tabıǵı resýrstar vıtse-mınıstri Mansur Oshýrbaev «Sý ekojúıelerin qalpyna keltirý – klımattyń ózgerýine beıimdelý sharasy: Soltústik (Kishi) Aral teńizin jańǵyrtý tájirıbesi jáne halyqaralyq yntymaqtastyq» atty paneldik sessııaǵa qatysty. Іs-shara Qazaqstannyń Ulttyq pavılonynda ótti.
Óz sózinde vıtse-mınıstr Qazaqstannyń Aral mańy ekojúıelerin qalpyna keltirý jáne óńirdi klımattyń ózgerýine beıimdeý baǵytynda júzege asyryp jatqan sharalary týraly baıandady.
– Ortalyq Azııa úshin klımattyń ózgerýine beıimdelý, eń aldymen, sý máselesimen baılanysty. Aral teńiziniń tarıhy muny aıqyn kórsetedi: sý ekojúıesimen birge jerdiń, klımattyń, halyq densaýlyǵynyń jáne tutas óńir ekonomıkasynyń turaqtylyǵy da álsireıdi, – dep atap ótti Mansur Oshýrbaev.
Soltústik Aral teńizin qalpyna keltirý nátıjelerine erekshe nazar aýdaryldy. Dúnıejúzilik banktiń qatysýymen Kókaral bógetin salý jobasyn qosa alǵanda, sý sharýashylyǵy jobalaryn iske asyrý nátıjesinde teńizdiń soltústik bóligin saqtap qalýǵa múmkindik týdy. Sońǵy jyldary sý kólemi 18,9 mlrd tekshe metrden 23 mlrd tekshe metrden astam kórsetkishke deıin ulǵaıdy.
Ekologııa jáne tabıǵı resýrstar mınıstrligi málimetinshe, sonymen qatar Qazaqstan Aral teńiziniń qurǵaǵan tabanyn kógaldandyrý boıynsha aýqymdy jumystar júrgizip jatyr. 2021–2025 jyldary orman-melıoratsııalyq is-sharalar 1,1 mln gektardan astam aýmaqty qamtydy. Sekseýil otyrǵyzý qumdy bekitýge, tuz ben shańnyń taralýyn azaıtýǵa yqpal etedi.
Sóz sońynda Mansur Oshýrbaev Ortalyq Azııanyń sý jáne qurlyq ekojúıelerin qalpyna keltirý úshin halyqaralyq yntymaqtastyqty keńeıtý, klımattyq qarjylandyrý tartý jáne birlesken ǵylymı monıtorıngti damytý qajettigin atap ótti.
Aral teńizine 1 mlrd tekshe metrden astam sý túskenin jazǵan edik.
