Túrkııada Qazaqstan mádenıeti kúnderi aıasynda Ermek Tursynov fılmderiniń kórsetilimi bastaldy
ANKARA. QazAqparat - Ankarada Qazaqstan mádenıeti kúnderi aıasynda belgili qazaq rejısseri Ermek Tursynov fılmderiniń kórsetilimi bastaldy, dep habarlaıdy «QazAqparat» HAA tilshisi.
Bir apta boıy túrik kórermenderi rejısserdiń: «Shal», «Kempir», «Kenje», «Kelin», «Jat» kartınalaryn tamashaý múmkindigine ıe bolady. Shara qarsańynda Tursynov Ankaraǵa baryp, túrik kórermenderimen suhbattasty. «Men búkil álemde óz fılmderimdi kórsettim, al Túrkııaǵa kınolarymmen alǵash ret kelip otyrmyn. Buǵan óte qýanyshtymyn, óıtkeni bizdiń túp-tamyrymyz bir, tilimiz ortaq», - dedi Ermek Tursynov.
Brıfıngte rejısser: «Álemdegi ár kórermen ár túrli. Sondyqtan meniń fılmim jurttyń bárine birdeı unaıdy dep aıta almaımyn. Bireýge «Kelin» unaıdy, basqa bireý «Shaldy» unatady. Endi bireýler «Kelindi» múldem unatpaıdy. Meniń fılmderimdi tamashalaýǵa ónerdi túsinetinder keledi dep úmittenemin», - dedi.
Onyń pikirinshe, «fılmderi túrik kórermenderi úshin bóten emes». «Festıvaldarda meniń kınolarym joǵary baǵasyn alady, biraq prokat múldem bólek dúnıe. Qazir kınonyń tili ózgergen, kórermender jappaı «Avatarǵa», «Transformerlerge» barady, al meniń kınolarymnyń óz kórermeni bar», - deıdi Ermek Tursynov.
