Túrkııada qazaq-túrik mádenı-bilim berý ortalyǵy ashyldy
Saltanatty tusaýkeser rásimge L.N. Gýmılev atyndaǵy Eýrazııa ulttyq ýnıversıtetiniń birinshi prorektory - oqý isi jónindegi prorektor Ásemgúl Moldajanova, EUÝ-dyń ınternatsıonaldandyrý jáne ımıdj ortalyǵynyń dırektory Seııt Álı Avdjý, Halyqaralyq qatynastar fakýltetiniń dekany Aqbota Joldasbekova jáne Nııde Omer Halısdemır ýnıversıtetiniń basshylary qatysty.
Ortalyqtyń ashylýy L.N. Gýmılev atyndaǵy Eýrazııa ulttyq ýnıversıteti men Nııde Omer Halısdemır ýnıversıteti arasyndaǵy yntymaqtastyqty damytýǵa jańa baǵdar bolyp tabylady. Túrkııadaǵy qazaq-túrik mádenı-bilim berý ortalyǵy Nııde Omer Halısdemır ýnıversıtetiniń rektory, professor Mýhsın Kar jáne Halyqaralyq yntymaqtastyq jónindegi departamentiniń dırektory Hýlıı Ýrýndı hanym, Túrkııa Respýblıkasynyń Tótenshe jáne Ókiletti Elshisi Nevzat Ýıanyk, sondaı-aq QR-dyń Túrkııadaǵy Tótenshe jáne Ókiletti Elshisi Abzal Saparbekulynyń qoldaýymen qurylyp otyr.
Bolashaqta bul ortalyq eki joǵary oqý oryndary arasyndaǵy yntymaqtastyqty úılestire otyryp, halyqaralyq ǵylymı-zertteý jóninde ǵylymı konferentsııalar ótkizedi, birlesken baǵdarlamalar daıyndap, qos oqý ornynyń ǵalymdary ǵylymı eńbekter jazady jáne birlese zertteýler júrgizedi.
Sonymen qatar, qazaq-túrik mádenı bilim berý ortalyǵy aldaǵy ýaqytta joǵary bilikti mamandar daıyndaıdy: bul bakalavrıat, magıstratýra jáne doktorantýra baǵdarlamalary boıynsha, sondaı-aq oqytýshylar men stýdentter úshin óte paıdaly bolmaq.
Aıta keteıik, ashylý saltanatynda ınjenerlik-tehnıkalyq sala boıynsha Túrki álemi ýnıversıtetter kongresin uıymdastyrý týraly kelisimge qol qoıyldy. Túrkııada ótetin birinshi kongress 2019 jyldyń basynda Nııde Omer Halısdemır ýnıversıtetinde bolsa, al ekinshisi 2020 jyly Qazaqstanda, ıaǵnı L.N. Gýmılev atyndaǵy Eýrazııa ulttyq ýnıversıtetinde ótedi.
Sondaı-aq, osy kúni eki ýnıversıtet arasynda memorandýmǵa qol qoıyldy. Endi akademııalyq utqyrlyq baǵdarlamalaryn júzege asyrý aıasynda qos ýnıversıtettiń ǵalymdary men oqytýshylary birlese jumys istep, ǵylymı-zertteý jobalaryn júzege asyrady jáne tájirıbe almasýǵa zor múmkindik týyp otyr.
