Túrkııada qaza tapqan Aıda Sarabaevanyń múrdesi apta sońyna deıin elge jetkiziledi
ASTANA. QazAqparat - Túrkııada jol apaty kezinde qaza tapqan qazaqstandyq týrıst Aıda Sarabaevanyń múrdesin elge ákelýge QR Syrtqy ister mınıstrligi járdemdesedi. Bul týraly vedomstvonyń resmı ókili Altaı Ábıbýllaev málim etti.
Onyń aıtýynsha, qazaqstandyqtyń denesi apta sońyna deıin ákelinedi.
"Búgin Aıda Sarabaevanyń denesin tanydy, ol oqıǵa ornynda qaza tapqan. Biz onyń barlyq týystary men jaqyndaryna kóńil aıtamyz. Bizdiń bilýimizshe, Aıdanyń ákesi - bizdiń áriptesimiz, "Astana" telearnasynda teleoperator bolyp qyzmet atqarady. Kóz jumǵan Aıdanyń ata-anasy Almatydan Antalııaǵa attandy. Konsýlymyz sol jaqta barlyq kómekti kórsetip jatyr", - dedi ol.
Onyń sózine qaraǵanda, Túrkııada jol apatynan alty adam japa shekken. Olardyń biri medıtsınalyq kómekten keıin aýrýhanadan shyqqan.
"Qazaqstan azamattary Kemer qalasynda demalǵan. Bes adam qazir aýrýhanada. Barlyǵy medıtsınalyq saqtandyrýdyń esebinen emderin alyp jatyr", - dep atap ótti resmı ókil.
"Mınıstrlik Aıdanyń denesin erteń nemese jeksenbide alyp kelý úshin Túrkııanyń quqyq qorǵaý organdaryna sot medıtsınalyq saraptamasyn jedeldetý boıynsha ótinish tastady. Qyzdyń ata-anasy onyń múrdesin Qaraǵandyǵa ákelýdi suraýda. Biraq Antalııadan Qaraǵandyǵa tikeleı reıs joq. Sondyqtan onyń denesi aldymen Astanaǵa jetkiziledi", - deıdi A. Ábıbýllaev.
Túrkııadaǵy jol apatynan qaza bolǵandardyń ishinde 18 jasar Aıda Sarabaevanyń bolǵany búgin belgili boldy. Apat 6 tamyzda Astana ýaqyty boıynsha 19:30-da oryn aldy. Avtobýs Pamýkkaleden Antalııaǵa bettep bara jatqan jerinde apatqa ushyrady. Saldarynan 4 adam kóz jumyp, 27 adam jaraqat aldy.
QR SIM aqparaty boıynsha, jaraqat alǵan 5 qazaqstandyq Denızlı qalasynyń aýrýhanasyna jetkizilgen.
