Túrkııada qańǵybas janýarlar máselesin sheshý maqsatynda keshendi baǵdarlama bastalady
ASTANA. KAZINFORM — Túrkııada qaraýsyz ıtter máselesi ózekti bolyp tur, dep habarlaıdy Kazinform-nyń menshikti tilshisi.
Elde kishkentaı balalar men qart adamdar jıi ıtterdiń shabýylyna ushyraıdy, mundaı oqıǵalardan soń adamdar qaza bolatyn jaǵdaılar da kezdesip jatady. Osyǵan baılanysty Túrkııa úkimeti halyqtyń qaýipsizdigin qamtamasyz etý úshin qajetti sharalar qabyldaýdy josparlap otyr.
Túrkııanyń Іshki ister mınıstriniń orynbasary Múnır Karaoǵlý qaraýsyz janýarlar máselesi eldegi eń kúrdeli áleýmettik problemalardyń biri ekenin atap ótti. Ol vedomstvonyń bul máseleni sheshýge barlyq kúsh-jigerin jumsaıtynyn jáne bul máseleni tolyq joıýdy maqsat etip qoıǵanyn aıtty.
Jaqyn arada qańǵybas janýarlardy aýlap, olardy qalpyna keltirý, vaktsınatsııalaý jáne jańa ıelerin tabý boıynsha keshendi baǵdarlama iske qosylmaq. Karaoǵlý aıtqandaı, eger keıbir janýarlarǵa jańa úı tabylmasa, olarǵa arnaıy aımaqtarda ómir súrý úshin jaıly jaǵdaılar jasalady.
Mınıstr orynbasary bul tásil tek janýarlarǵa gýmanıtarlyq kózqaraspen qaraýǵa ǵana emes, adamdardyń qaýipsizdigin qamtamasyz etýge jáne ekologııalyq jaǵdaıdy jaqsartýǵa baǵyttalǵanyn aıtty. Vedomstvo eriktiler men qaıyrymdylyq uıymdarymen birge jumys istep, janýarlarǵa yńǵaıly ómir súrý úshin barlyq qajetti jaǵdaıdy jasaıdy.
Jergilikti bılik qaraýsyz janýarlar úshin qaýipsiz jáne laıyqty jaǵdaılar jasaý úshin ınfraqurylymdy daıyndaýǵa kiristi. Bul baǵdarlama Túrkııada kóptegen qalany qamtyǵan jáne qoǵamda alańdaýshylyq týdyrǵan problema sheshý jolynda mańyzdy qadam bolmaq.
Іshki ister mınıstrligi bul baǵyttaǵy jumystar uzaq merzimdi perspektıvada jalǵasatynyn jáne janýarlardyń ǵana emes, azamattardyń da qaýipsizdigin qamtamasyz etýge baǵyttalǵanyn atap ótti.
Aıta keteıik, Túrkııada halyq eki topqa bólinip, kóshelerdegi ıtterdi aýlaý máselesin talqylap jatyr. Keıbireýler janýarlardy qorǵaıdy jáne olarǵa tamaq beredi, al basqalary olardyń sanyn azaıtýdy talap etedi. Qaraýsyz ıtter toptalyp, turǵyndarǵa belgili bir qıyndyqtar týǵyzady. Mysaly, ıtterde qutyrý aýrýy anyqtalǵannan keıin Túrkııada birneshe aýyl karantınge jabyldy. Sondaı-aq, jaqynda Túrkııada qaraýsyz ıtter 12 jasar balany óltirdi.
Buǵan deıin Túrkııa prezıdenti Redjep Taıyp Erdoǵan qańǵybas ıtter máselesin sheshý úshin aýqymdy naýqan bastalǵanyn jáne memlekettik organdardy batyl qadamdarǵa shaqyrǵan bolatyn.
Aıta ketelik Túrkııa iri áleýmettik jelilerdi óz aýmaǵynda kompanııa ashýǵa mindetteıdi.