Túrkııada qalyńdyq kóılegin kıip kórý úshin aqy alý tájirıbesi keń tarap barady
ASTANA. KAZINFORM — Úılený maýsymy jaqyndaǵan saıyn Túrkııadaǵy bolashaq qalyńdyqtar tek kóılekterdiń qymbattaýymen ǵana emes, sonymen qatar kútpegen jańa shyǵynmen – kıip kórý aqysynyń engizilýimen betpe-bet kelip otyr. Buryn bul qyzmet salondarda tegin kórsetiletin bolsa, qazir ol jeke aqyly qyzmetke aınalyp barady, dep habarlaıdy Kazinform agenttiginiń Ankaradaǵy tilshisi.
Türkiye gazetesi basylymynyń málimetinshe, «ólshep kórý bólmesine kirý» quny 500 lıradan (shamamen 5 200 teńge) bastalyp, salon deńgeıi men ornalasqan jerine qaraı 5 000 lıraǵa (shamamen 52 000 teńge) deıin jetedi. Al jeke dızaınerlik úlgiler úshin bul soma 10 000 lıraǵa (shamamen 104 myń teńge) deıin barady — ıaǵnı, kóılekti tek kıip kórgenniń ózi qomaqty qarajatty talap etedi.
Sala ókilderi bul tájirıbeni «mańyzdy emes klıentterdi irikteý» jáne qyzmetkerlerdiń júktemesin azaıtý qajettiligimen túsindiredi. Alaıda tutynýshylar mundaı ýájderdi qabyldaı bermeıdi. Kópshiliktiń pikirinshe, ondaǵan, tipti júzdegen myń lıra turatyn kóılekti satyp almas buryn ony kıip kórý – negizgi quqyq bolýy tıis, aqyly qyzmet emes.
Zańgerler de bul tájirıbeniń ádildigine kúmán keltirýde. Olardyń aıtýynsha, kıip kórýge shekteý qoıý tutynýshylar quqyǵyn buzý retinde qarastyrylýy múmkin, sebebi bul – mańyzdy ári qymbat tańdaý.
Jalpy eldegi baǵanyń ósýi jaǵdaıdy odan ári qıyndatyp otyr. Bıyl Túrkııada qalyńdyq kóılekteriniń baǵasy 30 000 lıradan (shamamen 311 myń teńge) 200 000 lıraǵa deıin (2 mln teńgeden asa) jetse, jalǵa alý quny shamamen 25 000 lıradan (260 myń teńge) bastalady. Osyndaı jaǵdaıda tipti «shaǵyn» kıip kórý aqysynyń ózi jas jubaılarǵa qosymsha qarjylyq salmaq túsiredi.
Nátıjesinde Túrkııanyń toı ındýstrııasy ekiudaı jaǵdaıda tur: bir jaǵynan bıznes shyǵyndardy ońtaılandyrýǵa tyryssa, ekinshi jaǵynan klıentterdiń narazylyǵy artyp keledi. Sebebi minsiz kóılekti tabý joly satyp alýdan buryn-aq qymbatqa túsip barady.
Sońǵy ýaqytta Túrkııada toı shyǵyndarynyń aıtarlyqtaı ósýine baılanysty qarapaıym ári bıýdjettik formattaǵy merekelerge qyzyǵýshylyq ta arta túsken.
Aıta keteıik, túrkııalyqtar úılený toıynyń shyǵynyn únemdeýge kóshti.
