Túrkııada Ystanbul ákimdigine qatysty jemqorlyq tergeýi jalǵasyp jatyr

ASTANA. KAZINFORM — Túrkııada Ystanbul merııasynyń qurylymdaryndaǵy jemqorlyqqa baılanysty aýqymdy tergeý jalǵasyp jatyr, dep habarlaıdy Kazinform agenttiginiń menshikti tilshisi.

Túrkııa polıtsııasy Ystanbul mýnıtsıpalıtetindegi paraqorlyq, alaıaqtyq jáne qyzmet ókilettigin teris paıdalaný derekterine qatysty is aıasynda toǵyzynshy tolqynmen ustaldy.

Túrik BAQ málimetinshe, sońǵy operatsııa barysynda mýnıtsıpalıtet qyzmetkerleri men merdigerlik uıymdardyń ókilderin qosa alǵanda, ondaǵan adam qamaýǵa alyndy. Olar mýnıtsıpaldyq kelisimsharttardy bólý men satyp alýlar kezinde jemqorlyq shemalaryna qatysy bar dep kúdiktelýde.

Jemqorlyq isi boıynsha 44 adamdy qamaýǵa alý týraly order berilgen. Olardyń ishinde Beıoǵlý aýdanynyń meri Inan Gıýneı, Ystanbul meriniń keńesshisi Iıgıt Ogýz Dýman jáne qala ákimdiginiń basqa da kóptegen qyzmetkerleri bar.

Operatsııa aıasynda merııa ǵımaratyna kirý jáne shyǵý tolyqtaı buǵattalyp, aýqymdy tintý jumystary bastaldy.

Tergeý dereginshe, kúdiktiler megapolıs bıýdjeti esebinen júıeli túrde paıda taýyp otyrǵan bolýy múmkin: tenderlik qujattardy qoldan jasap, smetalardy negizsiz kóterip jáne «otkat» alyp otyrǵan.

Іs prokýratýranyń baqylaýynda júrgizilýde. Quqyq qorǵaý organdary istiń sońyna deıin jetkiziletinin málimdedi. Keıbir derekterge qaraǵanda, tergeý kúdiktiler sheńberin keńeıtip jatqandyqtan, aldaǵy ýaqytta jańa ustaýlar bolýy múmkin.

Buǵan deıin Ystanbuldyń burynǵy meri Ekrem Imamoglý 1 jyl 8 aıǵa bas bostandyǵynan aıyrylǵany habarlanǵan edi.