Túrkııada ıslam kallıgrafııasy boıynsha asa aýqymdy kórme ótedi
ASTANA. 17 naýryz. QazAqparat - Islam óneri men kallıgrafııasy sheberleriniń eń úzdik týyndylary sáýir aıynda Ankara men Ystambulda eldiń nazaryna usynylatyn boldy.
«Kallıgrafııa sultany» dep atalatyn ekspozıtsııany Túrkııanyń Din isteri jónindegi mınıstrligi uıymdastyrady. Bul jaıynda World Bulletin habar taratty.
muslim.kz saıtynyń jazýynsha, bul shara Ystambul shaharynda Aııa-Sofııa meshitinde, al Ankara qalasynda Congresium májilis zalynda ótedi.
Atalmysh shara úshin Osmanly sultany Mahmud ekinshiniń, Selım úshinshiniń, Murat úshinshiniń jumystarymen qatar bertingi Osman qaǵanatynyń kallıgraf sheberleri Hafız Osmannyń, Iezarızad Mustafa Izettiń, Samı Efendiniń jáne osy zamanǵy kallıgraftardyń eńbekteri iriktelip alyndy.
300 týyndy Kallıgrafııa murajaıynan, Súleımen kitaphanasynan, Ystambul qalalyq murajaıynan, sondaı-aq, Topqaly saraıynan alyndy.
Bul shara Túrkııadaǵy ıslam kallıgrafııasyn alǵa súıregen asqan sheberlerdiń eń úzdik týyndylaryn tamashalaýǵa múmkindik beretin asa aýqymdy joba bolyp tabylady.
