Túrkııada ınsýlt alǵan er adam týǵan tilin umytyp qalǵan

ASTANA. KAZINFORM — 67 jastaǵy Rahmı Karademır Túrkııanyń Konıa qalasynda ınsýlt alǵan soń, kóp jyl boıy qoldanbaǵan dat tilinde sóıleı bastady, dep habarlaıdy Anadoly.

Bul onyń jaqyndary men medıtsınalyq qyzmetkerlerdi tańǵaldyrdy.

Jeti balanyń ákesi Karademır Danııada 20 jyl turyp, 10 jyl buryn Túrkııaǵa oralyp, Konıaǵa qonystanǵan.

Ótken aptada ol Selchýk ýnıversıtetiniń medıtsına fakýltetiniń ortopedııa bóliminde tizesine ota jasatqan.

Otadan eki kún ótken soń onyń oń qoly men aıaǵy álsirep, sóıleý qabileti buzylǵan.

Jedel dıagnostıkadan keıin mıynyń sol jaǵyndaǵy iri arterııanyń trombpen bitelgeni anyqtaldy.

Dárigerler jedel angıografııa jasap, trombty alyp tastady.

Protsedýradan keıin negizgi nevrologııalyq belgiler tez joıyla bastady. Biraq Karademırdiń kóp jyl boıy qoldanbaǵan dat tilinde sóıleýi, ásirese áıeli men týystary úshin kútpegen jaǵdaı boldy.

Túrik tilinde sóıleı almaǵan Karademır kúızeliske tústi, al buryn umyt bolǵan tildiń qaıta eske túsýi mamandardyń nazaryn aýdardy.

Selchýk ýnıversıteti klınıkasynyń nevrologııa kafedrasynyń meńgerýshisi, trombektomııa jasaǵan professor Gekhan Ozdemır bul sırek kezdesetin qubylys ekenin atap ótti.

— Biz patsıenttiń túrik tilinde sóıleı almaıtynyn, biraq umytty dep eseptelgen dat tilinde erkin sóıleıtinin baıqadyq. Medıtsınalyq ádebıette birneshe til biletin adamdarda ınsýlttan keıin bir til joǵalyp, ekinshisi kútpegen jerden belsendi bolatyn sırek jaǵdaılar sıpattalǵan. Insýlttan keıin kem degende bir tilde sóıleý qabileti qalsa, bul keıingi ońaltý úshin mańyzdy artyqshylyq, — dep túsindirdi Ozdemır.

Osyǵan deıin Túrkııada medıtsına jáne kosmetologııa maqsatynda saryshaıan ósirýge ruqsat etilgeni málim boldy.