Túrkııada ınflıatsııa 30 paıyzdan asty, alaıda bırja áli ósip keledi

ASTANA. KAZINFORM – Túrkııanyń resmı statıstıkasynyń qańtardaǵy málimetteri jyldyq mánde ınflıatsııanyń baıaýlaǵanyn kórsetti. Alaıda baǵalar kúrt ósti, dep habarlaıy Kazinform menshikti tilshisi.

Túrkııa statıstıka ınstıtýty (TÜİK) 2026 jyldyń qańtaryna arnalǵan tutynýshylyq ınflıatsııa derekterin jarııalady. Jyldyq esepte baǵa ósimi 30,65 paıyzdy quraǵan. Al 2025 jyldyń jeltoqsanymen salystyrǵanda ınflıatsııa 4,84 paıyzǵa deıin jedeldep, ekonomıkadaǵy baǵa qysymynyń áli de kúshti ekenin kórsetti.

Soǵan qaramastan, qarjy naryqtary kútpegen optımızm tanytty. Ystanbul qor bırjasynyń ındeks 3,16 paıyzǵa ósti. Bul ınvestorlardyń aktsııalardy ınflıatsııa men ulttyq valıýtanyń álsireýinen qorǵaný quraly retinde áli de tartymdy sanaıtynyn bildirýi múmkin.

Shetel valıýtalarynyń baǵamy joǵary deńgeıde qaldy: dollar 43,46 lırada, eýro 51,81 lırada turaqtady.

Al dástúrli túrde «qaýipsiz aılaq» sanalatyn altyn kerisinshe arzandady. Onyń baǵasy 3 paıyzǵa tómendep, bir gramy 7 303 lıraǵa tústi. Bul shamamen 170 AQSh dollaryna teń.

Osylaısha, 2026 jyldyń basynda Túrkııada qaıshylyqtarǵa toly boldy. Bir jaǵynan, joǵary ınflıatsııa tutynýshylarǵa salmaq túsirse, ekinshi jaǵynan, qarjy naryqtary saq bolsa da, belgili bir úmittiń baryn ańǵartty.

Eske sala keteıik, buǵan deıin 2025 jyldyń jeltoqsanynda Túrkııadaǵy jyldyq ınflıatsııa 2021 jyldyń sońynan bergi eń tómengi deńgeıge túskeni habarlanǵan edi.