Túrkııada Halyqaralyq balalar festıvali ótedi

ASTANA. QazAqparat - Túrkııadaǵy Býrsa provıntsııasynda  40-ynshy Halyqaralyq balalar festıvali ótedi, dep habarlaıdy Anadoly agenttigi.

Oǵan 40 eldiń balalary qatysady. 23 sáýirde ótetin osy shara 1979 jyldan beri Túrkııa teleradıokompanııasynyń halyqaralyq deńgeıde uıymdastyratyn  biregeı balalar merekesi.

Festıval álemniń túrli elderindegi balalardy dostastyrýǵa yqpal etedi. Festıvaldyń ashylý saltanaty Túrkııa prezıdenti Rejep Taıyp Erdoǵannyń demeýimen Ankaradaǵy Prezıdent kesheninde ótedi.

Sharaǵa qatysýshylar bul qalada birneshe kún bolyp, keıin Býrsaǵa attanady.

23 sáýir Ulttyq sýverenıtet jáne balalar kúni - Túrkııanyń ulttyq merekesi.

Túrik Respýblıkasynyń negizin qalaýshy Mustafa Kemal Atatúrik balalarǵa syılaǵan osy kúnde jyl saıyn túrli sharalar ótip jatady.

 Foto: aa.com.tr