Túrkııada halyqtyń qartaıýy jedeldep barady: qarttar sany 9,5 mln-nan asty

ASTANA. KAZINFORM — Túrkııada 65 jastan asqan turǵyndardyń úlesi turaqty túrde ósip, el halqynyń 11%-dan astamyn qurady. Bul týraly Kazinform agenttiginiń Ankaradaǵy menshikti tilshisi habarlady.

Túrkııa halqynyń qartaıý úderisi jedeldep keledi. Túrkııanyń statıstıka ınstıtýty (TÜİK) jarııalaǵan «Qarttar statıstıkasy – 2025» bıýlletenine sáıkes, elde 65 jas jáne odan joǵary jastaǵy azamattardyń sany 9 mıllıon 583 myń adamǵa jetken.

Sońǵy bes jyl ishinde bul kórsetkish 20,5%-ǵa artty. Nátıjesinde qarttardyń jalpy halyq sanyndaǵy úlesi 9,5%-dan 11,1%-ǵa deıin ósti.

Statıstıka derekterine qaraǵanda, qart turǵyndardyń jartysynan astamy – áıelder. Olardyń úlesi 55,3%-dy qurasa, erlerdiń úlesi 44,7%-dy quraıdy.

Sonymen qatar elde halyqtyń medıandyq jasy da ósip keledi. Bul kórsetkish halyqty jasyna qaraı teń eki bólikke bóledi: bir bóligi osy jastan kishi bolsa, ekinshi bóligi úlken bolady. Eger 2020 jyly Túrkııada medıandyq jas 32,7 jasty qurasa, 2025 jylǵa qaraı ol 34,9 jasqa deıin artqan.

Sarapshylardyń pikirinshe, qarttar sanynyń artýy – eldegi negizgi demografııalyq úrdisterdiń biri. Bul aldaǵy onjyldyqtarda densaýlyq saqtaý júıesine, áleýmettik qamsyzdandyrý salasyna jáne eńbek naryǵyna eleýli áser etýi múmkin.

Buǵan deıin elde áıelder halyqtyń shamamen jartysyn quraıtyny habarlanǵan edi. Sonymen qatar Túrkııada áıelderdiń bilim deńgeıi ósip, olardyń saıasattaǵy jáne eńbek naryǵyndaǵy qatysýy birtindep artyp kele jatqany baıqalady.

Aıta keteıik, buǵan deıin Túrkııa birtindep plastıkten bas tartpaqshy ekenin jazǵan edik.