Túrkııada Halıfa Altaıdy eske alý keshi ótti
Jıynǵa Qazaqstan, Túrkııa, Frantsııa elderinen kelgen ǵalymdar men qoǵam qaıratkerleri, Parıj, Ystanbul qalalarynda turatyn Ábdisamat Altaı, Meshkúre, Shekúre sekildi basqa da urpaqtary, jaqyn týystary qatysyp sóz sóıledi.
Halıfa Altaıdyń ómir jolyna, Túrki dúnıesindegi orny men elge oralý tarıhyna, shyǵarmashylyǵy jáne ony zertteý máselelerine qatysty Almaty qalasynan kelgen uly Ábdirahım Altaı, Dúnıejúzi qazaqtary qaýymdastyǵy hatshysy Botakóz Ýatqan, L.N. Gýmılev atyndaǵy Eýrazııa ulttyq ýnıversıteti «Otyrar kitaphanasy» ǵylymı ortalyǵy dırektorynyń orynbasary, tarıh ǵylymdarynyń doktory Danagúl Mahat sóz sóıledi.
Mımar Sınan ýnıversıtetiniń professory, tarıh ǵylymdarynyń doktory Ábdiýaqap Qara da Halıfa Altaı jaıly úlken tebirenispen áńgime órbitti. Onyń aıtýynsha, Túrkııa Mádenıet mınıstrliginiń qoldaýymen 1980 jyly jaryq kórgen Halıfa Altaıdyń «Atajurttan Anadolyǵa» atty eńbegi erekshe baǵalaýǵa turarlyq. Onda Ór Altaıdan qazirgi Túrkııaǵa kóshken qaımana qazaqtyń taǵdyr-taýqymetinen tyń derekter keltirgen.
«Alash jurty Halıfa Altaımen maqtanamyz. Tek Túrkııadaǵy qazaqtar ǵana emes, búkil túrki dúnıesi Halıfa Altaımen maqtanady. Óıtkeni ol Quran Kárim sııaqty qasıetti kitabyn qazaq tilinde sóıletken tulǵa. Sonymen qatar, onyń eńbekteri halyqaralyq kólemde mándi bolyp otyr. Ony zerttegen nemis ǵalymdary bar. Mark Kıshner Gıssen ýnıversıtetiniń professory kezinde Halıfa Altaıdan sabaq alǵan, kómek alǵan. Ol kisiniń de Halıfa Altaı jaıly zertteýleri, maqalalary bar. Endeshe Halıfa Altaı búkil túrki álemine jáne Eýropaǵa tanymal uly azamat», - dedi professor Ábdiýaqap Qara.
Uıymdastyrýshylardyń aıtýynsha, alda ǵulamanyń mereıli 100 jyldyq mereıtoıyna arnalǵan halyqaralyq konferentsııa Astana qalasy men Eýropanyń birqatar elderinde ótkiziledi dep josparlanǵan. 
