Túrkııada fýtbolshy Hakan Shúkirdi tutqynǵa alýǵa order berildi
ASTANA. QazAqparat - «Galatasaraı» túrik klýby sapynda fýtbol oınaǵan tanymal fýtbolshy Hakan Shúkirdi tutqyndaýǵa Túrkııa bıligi order berdi, dep habarlaıdy Bı-Bı-Sı agenttigi.
Fýtbolshyny tutqynǵa alý 15 shilde kúni eldegi memleket tóńkeris áreketin tergeýmen tyǵyz baılanysty, dep habarlady Anadoly agenttigi.
Agenttiktiń habarlaýynsha, H.Shúkirdi Ankara kóteriliske qatysy bar dep sanaıtyn oppozıtsııalyq túrik ýaǵyzshysy Fethýlla Gúlenmen baılanysy bar terrorıstik toptyń múshesi dep aıyptalýda.
Túrkııalyq BAQ-qa súıensek, H.Shúkir men onyń otbasy ótken jyly Túrkııadan qonys aýdarǵan. 44 jastaǵy fýtbolshy sporttaǵy mansabyn 2008 jyly aıaqtaǵan. Jankúıerleri ony «Bosfor ógizi» jáne «Patsha» dep atap ketken.
