Túrkııada fýd-ınflıýenserlerge salyqtyq baqylaý kúsheıtiledi
ASTANA. KAZINFORM – Túrkııa bıligi tanymal aspazdyq kontent avtorlaryna tegin tamaqtaný, PR-syılyqtar jáne jarnamalyq ıntegratsııa tabys bolyp sanalatynyn jáne olarǵa salyq salynatynyn eske saldy. Birlesken tólemderden 15% tabys salyǵy ustalady, dep habarlaıdy Kazinform agenttiginiń Ankaradaǵy tilshisi.
Túrkııada meıramhanalar men tamaq ónimderine sholý jasaıtyn blogerler kútpegen «salyqtyq tosyn syıǵa» tap boldy. Inflıýensterge arnalǵan bilim berý baǵdarlamasynyń aıasynda bılik jarnamaǵa aıyrbas retinde alynǵan kez kelgeni – aqsha, syılyqtar nemese tegin tamaq bolsyn – tabys bolyp sanalatynyn jáne oǵan salyq salynatynyn túsindirdi.
Ystanbulda «jaýapty ınflıýensterdi 4-shi oqytý» baǵdarlamasy Saýda mınıstrligi, Qazynashylyq jáne qarjy mınıstrligi, sondaı-aq jarnama uıymdarynyń qatysýymen ótti. Qatysýshylar jarnama salasyndaǵy zańdy mindettemeler, jeke derekterdi qorǵaý, zııatkerlik menshik jáne salyq zańnamasy týraly egjeı-tegjeıli aqparat aldy.
15% – avtomatty túrde
Jańa túsindirmelerge sáıkes, agenttikter men jarnama berýshiler jarnama jáne demeýshilik úshin ınflıýenserlerge tólengen jalpy somadan 15% tabys salyǵyn ustap qalýǵa mindetti. Bul qarajat tıisti salyq mártebesi bar blogerdiń arnaıy bank shotyna aýdarylýy tıis.
Eger meıramhana blogerdi jazba úshin «tegin» keshki asqa shaqyrsa, sol keshki as quny da tabys sanalady. Mekeme somany ınflıýenserdiń bank shotyna aýdarýǵa, tólemdi málimdeýge jáne salyqty ustap qalýǵa mindetti.
Tegin syılyq endi joq
Salyq brendterden PR-jóneltilimder, dámsaraptar jáne aqshalaı emes ótemaqy basqa da kez kelgen túrine de salynady. Jalpy tabys belgilengen salyqtan bosatý sheginen asyp ketse, bloger belgilengen tártippen qosymsha salyq tóleýge mindetti. Kezdesýde sandyq ortada zańsyz qumar oıyndardy nasıhattaǵany úshin jaýapkershilikke erekshe nazar aýdaryldy. Bılik áleýmettik jelilerdi zańsyz mqlsherlemelerdi jarnamalaý úshin paıdalaný aýyr quqyqtyq saldarǵa ákelýi múmkin ekenin atap ótti.
Osylaısha, túrik bıligi ınflıýenser ekonomıkasyndaǵy «sur» tabys dáýiri aıaqtalyp kele jatqanyn, al tsıfrlyq tanymaldylyq qazir dástúrli bıznes sııaqty qarjylyq tártipti talap etetinin anyq bildirtip otyr.