Túrkııada FETO isi boıynsha aýqymdy arnaıy operatsııa júrgiziledi
ASTANA. KAZINFORM — Arnaıy operatsııalar eldegi áskerı tóńkeris jasaý áreketiniń 10 jyldyǵy qarsańynda júrgizilmek, dep habarlaıdy Kazinform agenttiginiń Ankaradaǵy menshikti tilshisi.
Hürriyet Daily News basylymynyń málimetinshe, Túrkııa prokýratýrasy Fethýllah Gıýlenniń terrorıstik uıymymen (FETO) baılanysy bar degen kúdikpen 968 adamdy ustaýǵa order bergen. Túrkııa bıligi bul uıymdy 2016 jylǵy 15 shildede elde áskerı tóńkeris jasaýǵa árekettendi dep aıyptaıdy.
Quqyq qorǵaý organdarynyń aýqymdy arnaıy operatsııasy eldiń 81 provıntsııasyn qamtydy. Kúdiktilerdiń eń kóbi Ankara, Ystanbul jáne Izmır qalalarynda anyqtalǵan.
Túrkııanyń Ádilet mınıstri Akyn Gıýrlek FETO-men kúres 2016 jylǵy 15 shildedegi oqıǵalardan keıingi sııaqty tabandylyqpen jalǵasyp jatqanyn aıtty. Onyń sózinshe, qazirgi arnaıy operatsııa — «eldi tazartý jónindegi aýqymdy naýqannyń» bir bóligi.
Eske salaıyq, 2016 jylǵy 15 shildede Túrkııa bıligi FETO uıymymen baılanystyrǵan bir top áskerı qyzmetker memlekettik tóńkeris jasaýǵa árekettengen bolatyn. Kóterilis kezinde Ankara men Ystanbulda tankter men áskerı avıatsııa qoldanylyp, Parlamentti qosa alǵanda birqatar memlekettik mekemelerge shabýyl jasaldy. Resmı málimet boıynsha, sol kezde 253 adam qaza taýyp, 2,7 myńnan astam adam jaraqat alǵan.
Tóńkeris áreketinen keıin Túrkııa bıligi FETO uıymyna qatysy bar degen kúdikke ilingender men ony qoldaýshylarǵa qarsy keń aýqymdy naýqan bastady. Sońǵy on jyl ishinde ondaǵan myń adam memlekettik qyzmetten bosatylyp nemese qylmystyq jaýapkershilikke tartyldy.
15 shilde oqıǵasynyń 10 jyldyǵyna oraı Túrkııa bıligi Parlamenttiń arnaıy otyrysyn jáne 200-den astam eske alý is-sharasyn qamtıtyn jalpyulttyq baǵdarlama ázirledi.
Buǵan deıin habarlanǵandaı, Túrkııada mektepterge oqýshylardyń sýretin ınternette jarııalaýǵa tyıym salyndy.
