Túrkııada esirtki men zańsyz bás tigýlerge qarsy operatsııalar ótkizildi

ASTANA. KAZINFORM - Bıylǵy naýryz aıynda Túrkııanyń quqyq qorǵaý organdary esirtki qylmystary, zańsyz bás tigý jáne onlaın qumar oıyndarǵa qarsy júzdegen operatsııa ótkizdi, dep habarlaıdy Kazinform agenttiginiń Ankaradaǵy menshikti tilshisi.

Túrkııanyń ádilet mınıstri Akyn Gıýrlek elde esirtkige, zańsyz bás tigýge jáne vırtýaldy qumar oıyndarǵa baılanysty qylmystarmen kúrestiń aýqymdy nátıjeleri týraly málimdedi.

— Eń kóp protsessýaldyq áreketter Ystanbuldda tirkeldi. Mundaı qylmys túrleri qoǵam úshin eleýli qaýip tóndiredi, jastardy táýeldilik pen qylmystyq ortaǵa tartýǵa yqpal etedi, sondaı-aq otbasylyq jáne áleýmettik negizderdi álsiretedi. Biz bul qubylystarǵa qarsy belsendi ári júıeli kúresti jalǵastyramyz, — dedi mınıstr.

Onyń aıtýynsha, naýryz aıynda el boıynsha 171 ret prokýratýranyń úılestirýimen 729 operatsııa júrgizilgen. Osy is-sharalar aıasynda 9 185 kúdiktige qatysty quqyqtyq sharalar qabyldanyp, olardyń 2 996-sy qamaýǵa alynǵan, taǵy 820 adam sottyń baqylaýymen bosatylǵan.

Operatsııalardyń bir bóligi esirtki qylmystaryna qarsy reıdter boldy. Barlyǵy 669 operatsııa júrgizilip, nátıjesinde 7 568 adam jaýapqa tartyldy, al 2 541 kúdikti qamaýǵa alyndy.

Zańsyz bás tigýlerge qarsy kúres aıasynda 56 operatsııa ótkizildi, olar boıynsha 1 608 adam jaýapqa tartylyp, olardyń 455-i tutqyndaldy.

Buǵan deıin Túrkııadaǵy tanymal tulǵalardyń aǵzasynan esirtki zattary anyqtalǵany týraly saraptama nátıjeleri jarııalanǵan edi. Olardyń qatarynda belgili túrik modeli Dıdem Soıdan da bar.