Túrkııada eski dollar aınalymnan alynyp jatyr

ASTANA.KAZINFORM – Túrkııadada eski dollar kýpıýrasyn qabyldaý toqtatyldy. Bul týraly Kazinform-nyń menshikti tilshisi habarlaıdy.

Mundaı sheshim qabyldaýǵa sapasy jaǵynan naǵyz kýpıýradan erekshelenbeıtin jalǵan dollarlardyń kóptep taralýy sebep boldy.

Túrik sarapshylarynyń pikirinshe, jańa jalǵan banknottar tipti zamanaýı sanaý mashınalarynan óte alady, bul óz kezeginde olardy anyqtaý jumysyn qıyndatady. Osyǵan baılanysty qarjy ınstıtýttary eski banknottarmen jumys isteýden bas tartyp, saqtyq sharalaryn qabyldaýǵa májbúr.

Mamandardyń aıtýynsha, Túrkııa naryǵynda 600 mıllıon dollarǵa jýyq jalǵan 50 jáne 100 dollarlyq kýpıýralar bar.

Bul jaǵdaı dollar negizgi valıýtasy bolyp qala beretin azamattar men kásipkerlerdiń alańdaýshylyǵyn týdyrdy. Qarjy sarapshylary táýekelderdi boldyrmaý úshin qolma-qol aqshamen, ásirese eski kýpıýralarmen jasalatyn iri operatsııalardan ýaqytsha bas tartýǵa keńes beredi.

Buǵan deıin jalǵan kýpıýra jasaýǵa kóbinese 50 jáne 100 dollarǵa basymdyq beretini habarlanǵan bolatyn.