Túrkııada erler de dekretke shyǵatyn boldy
ASTANA. 8 sáýir. QazAqparat - Túrkııada áıelderdiń jumyspen qamtylýyn arttyrý maqsatynda ata-analardyń dekrettik demalysy uzartylatyn boldy. Osyǵan baılanysty áıeldermen qatar erlerge de dekrettik demalys alýǵa múmkindik berilip otyr. Bul jaıynda haber7.com habar taratty.
Túrik áıelderdiń áleýmettik belsendiligin arttyrý naýqany aıasynda ári ár úıde bala sanyn kem degende úsh balaǵa deıin kóbeıtý maqsatynda osy eldiń otbasy isteri jáne áıelder saıasaty jónindegi mınıstrligi aıaq-qolyn baýyryna endi alǵan analardyń ómirin edáýir jeńildetetin jańa zań jobasyn ázirledi.
muslim.kz saıtynyń jazýynsha, atalmysh normatıvtik-quqyqtyq aktiniń artyqshylyǵy sonda, bosanǵanyna eki aıdan tórt aı ótkenge deıin áıelderdiń bala kútimine qatysty aqy tólenetin demalysy uzartylatyn bolady. Eń bastysy, emshektegi sábıdi qaraý úshin erlerge de demalys alý quqyǵy berilmek. Bul zań jobasy boıynsha er-azamattarǵa áıelderimen birge bir mezgilde demalys alýyna da nemese ony keıinge qaldyrýyna da jaǵdaı jasalǵan.
Emshektegi sábıi bar áıelder jumysqa shyqqannan keıin belgili bir ýaqyt aralyǵynda jumystan keshigýine de, sondaı-aq, jumystan erte ketýine de ruqsat berilgen. Sonymen qatar, eger jumysyna zalal kelmeıtin bolsa, olardyń úıinde otyryp, jarty stavkamen jumys isteýine de jaǵdaı qarastyrylǵan. Jańa zań jobasyndaǵy keıbir ózgerister jumys berýshilerge qatysty engiziledi. 100-150 áıel jumys isteıtin kásiporyndarda mindetti túrde balalar baqshasy ashylatyn bolady.
