Túrkııada Erdoǵannyń ólimi týraly aqparat tarady: gazet ókilderi ústinen is qozǵaldy
ASTANA. KAZINFORM — Túrkııanyń Aıdyn qalasynda áleýmettik jelide el prezıdenti Rejep Taııp Erdoǵannyń baqılyq bolǵany týraly habarlama jarııalanǵannan keıin prokýratýra tergeý bastady. Bul týraly Ankaradaǵy Kazinform agenttiginiń menshikti tilshisi habarlady.
Jergilikti gazettiń Facebook-tegi paraqshasynda qara tústi fonda «Erdoǵan qaıtys boldy» degen iri jazýy bar sýret jarııalanǵan. Jazba kóp uzamaı áleýmettik jeli qoldanýshylarynyń nazaryn aýdaryp, quqyq qorǵaý organdarynyń aralasýyna sebep boldy.
Keıin bul materıal gazettiń saıtynda Gúlshen Erdoǵan esimdi azamatshanyń qaıtys bolýyna baılanysty jarııalanǵan nekrologpen baılanysty ekeni anyqtaldy. Alaıda áleýmettik jelidegi jazbanyń mátini men bezendirilýi prezıdent Erdoǵan týraly aıtylyp jatqandaı áser qaldyrǵan.
Aıdyn prokýratýrasy Túrkııa Qylmystyq kodeksiniń 217/A-baby boıynsha, ıaǵnı qoǵamdy adastyratyn aqparatty jarııa túrde taratý faktisi boıynsha tergeý bastady.
Tergeý aıasynda gazet ókili, jaýapty redaktor jáne materıaldy daıyndaǵan jýrnalısti ustaýǵa order berildi.
Gazettiń nusqasy boıynsha, jarııalanym aty-jóni prezıdentpen birdeı azamatshanyń qaıtys bolýyna qatysty bolǵan. Alaıda habarlamanyń formýlırovkasy men áleýmettik jelidegi vızýaldy bezendirilýi qylmystyq tergeýge sebep boldy.
Buǵan deıin Túrkııanyń Uly Ulttyq Májilisi shyndyqqa sáıkes kelmeıtin aqparat taratqany úshin úsh jylǵa deıin bas bostandyǵynan aıyrý jazasyn qarastyratyn zań jobasyn maquldaǵany habarlanǵan bolatyn.
