Túrkııada er adam sot ǵımaratynda oq jaýdyrdy: qaza tapqandar men jaralanǵandar bar
ASTANA. KAZINFORM - Túrkııanyń Býrsa qalasynda qarýly adam sot ǵımaratynda oq jaýdyrdy.
Oqıǵa saldarynan eki adam qaza taýyp, taǵy ekeýi jaraqat aldy.
Býrsanyń 6-shy Joǵarǵy qylmystyq soty qaladaǵy saýda jáne oıyn-saýyq ortalyqtarynyń birinde 2023 jyly er adamdar arasynda bolǵan qarýly tóbeleske qatysty ekinshi sot otyrysyn bastady. Osy oqıǵanyń saldarynan 21 jastaǵy jigit alǵan jaraqatyna baılanysty bir jyl múgedekter arbasyna tańylǵan.
Belgili bolǵandaı, sot zalynda jábirlenýshiniń ákesi ulynyń kek alý úshin aıyptalýshyǵa oq jaýdyrǵan.
Oqıǵa ornyna dereý polıtsııa men jedel járdem qyzmetkerleri jetken. Zardap shekkender aýrýhanalarǵa jetkizilip, olarǵa qajetti kómek kórsetildi.
Quqyq qorǵaý organdary qarýly shabýyldyń mán-jaıyn anyqtap jatyr. Qarý sot ǵımaratyna jábirlenýshiniń múgedekterge arnalǵan arbasymen ákelingen, ol muqııat tekserilmegen.
Jaǵdaı ýákiletti organdardyń qatań baqylaýyna alyndy. Qazirgi ýaqytta aýdanda qaýipsizdikti qamtamasyz etý úshin barlyq sharalar qabyldandy.
Osyǵan deıin terrorıstik uıymǵa qatysy bar bolýy múmkin qazaqstandyq Túrkııadan ákelingeni týraly jazdyq.