Túrkııada Entonı Blınken sapary qarsańynda áldebireýler AQSh áýe bazasyna basyp kirmek boldy
Birneshe kún buryn túriktiń Adam quqyqtary jáne bostandyqtary (IHH) gýmanıtarlyq kómek qory Palestınaǵa qoldaý kórsetý úshin Ystanbuldan jolǵa shyqqan edi. Olar uıymdastyrǵan «Palestınaǵa erkindik konvoıy» qozǵalysynyń músheleri Adanadaǵy AQSh-qa qarasty Injırlık bazasy aldynda Izraıldiń Palestınaǵa jasaǵan shabýylyna narazylyq bildirdi, dep habarlaıdy Kazınform Anadoly agenttigine silteme jasap.
Túrkııanyń ártúrli provıntsııasynan kelgen úkimettik emes uıym ókilderi men jaı azamattar AQSh Áýe kúshterine qarasty 39-shy áýe bazasy ornalasqan Injırlık qolbasshylyǵy aldynda bas qosty.
Olar qolyna Túrkııa men Palestına týyn ustap, Izraıl men AQSh-qa qarsy urandar aıtyp, narazylyq bildirdi.
Osy ýaqytta toptaǵy keı adamdar Injırlık bazasyna kirýge tyrysty. Olardyń áreketine polıtsııa tosqaýyl qoıdy.
Sol jerde sóz sóılegen «Adam quqyqtary jáne bostandyqtary» gýmanıtarlyq kómek qory tóraǵasy Búlent Iyldyrym Injırlıkke ne úshin kelgenderin túsindirdi.
Onyń aıtýynsha, osynda kelý arqyly Amerıkany Izraılge qoldaý kórsetýden aýlaq bolýǵa shaqyrmaq bolǵan.
«Ashýymyzdyń qattylyǵy sonsha, ózimizdi ustaı alar emespiz. Biraq Túrkııa qolynan kelgenniń bárin jasap jatyr. Islam álemi búkil Eýropada, Amerıkada narazylyǵyn kórsetip jatyr. Bul qarsylyq ári qaraı kúsh alyp, kóbeıe beredi dep úmittenemiz», — dedi ol.
Onyń aıtýynsha, qozǵalys óz málimdemesin jasady. Amerıka muny kórdi jáne estidi.
«Endi mıtıng alańynan únsiz ketemiz. Olar kelisimdi qazir jasaıdy dep úmittenemin. Áıelder men balalardy soǵys alańynan aman shyǵarýǵa tyrysamyz», — dedi ol.
Iyldyrym Injırlık bazasyna ózimen birge kelgenderden aımaqtan ketýdi surady.
«Bizdiń mindetimiz — jaralanǵandardy, áıelder men balalardy qaýipsiz jerge alyp ketý. Biz óz narazylyǵymyzdy bildirdik, ashýymyzdy kórsettik. Budan birdeńe shyǵady dep úmittenemin», — dedi ol.
Mıtıng kezinde keı adamdar tas, bótelke jáne otshashý laqtyryp, Injırlık bazasyna kirmek boldy.
«Polıtsııaǵa tas nemese basqa nárse laqtyrǵandardyń bizge esh qatysy joq, bul — uıat tirlik. Qazir bul jerden ketpeseńder, Túrkııa ekige bólinedi. Túrkııa qazir polıtsııasymen, áskerimen jáne búkil bólimshelerimen birge Gaza jaǵynda. Ketińder» - dedi Iyldyrym.
Polıtseıler bazaǵa kirgisi kelgenderge sý men burysh gazyn shashyp, tosqaýyl qoıdy.
Osy málimdemeden keıin keı adamdar tarap ketse, keıbiri bazaǵa kirý áreketin jalǵastyrdy.
Eske sala keteıik, erteń Túrkııa astanasyna AQSh memlekettik hatshysy Entonı Blınken keledi dep kútilip otyr.
