Túrkııada elektromobıl sany 400 myńǵa jýyqtady

ASTANA. KAZINFORM — Túrkııada ekologııalyq kólikke qyzyǵýshylyq artyp keledi. Túrkııa statıstıka ınstıtýty (TÜİK) deregine sáıkes, 2026 jyldyń aqpanynda elde 395 697 elektromobıl tirkelgen. Bul ótken jylmen salystyrǵanda 92%-ǵa kóp, dep habarlaıdy Anadoly.

Gıbrıdti kólikterdiń sany da ósip, 741 149-ǵa jetti. Jalpy eldegi avtokólik sany 17 523 423.

Sarapshylar suranystyń artýyn kómirtek shyǵaryndylarynyń tómendigimen, energııa tıimdiligimen, dybysynyń azdyǵymen jáne zarıadtaý ınfraqurylymynyń keńeıýimen baılanystyrady.

Sonymen qatar ulttyq elektromobıl Togg ta bul úrdiske serpin berdi.

Salystyrmaly túrde alǵanda, 2015 jyly Túrkııada nebári 565 elektromobıl bolǵan.

2024 jyly olardyń sany 183 776-ǵa, 2025 jyly 370 591-ge jetse, 2026 jyldyń aqpanynda 396 myńǵa jýyqtady.

Qazirgi tańda elektromobılderdiń jalpy avtoparktegi úlesi 2,3%.

Gıbrıdti kólikterge qyzyǵýshylyq ta joǵary. Olar alǵash ret 2011 jyly tirkelse (23 kólik), 2019 jyly 13 877-ge, 2023 jyldyń sońynda 222 328-ge, 2024 jyly 391 296-ǵa, al 2026 jyldyń basynda 741 149-ǵa jetti. Olardyń avtoparktegi úlesi 4%-dan 4,2%-ǵa deıin ósti.

Aıta ketelik Qytaıda elektromobılderge arnalǵan qýattaý qurylǵylarynyń sany 21 mln-nan asqany týraly jazǵan edik.