«Túrkııada Elbasyna eskertkish qoıylady» - respýblıkalyq basylymdarǵa sholý

***

Túrkııada Elbasyna eskertkish qoıylady. Bul týraly elimizde resmı saparmen júrgen atalǵan eldiń basshysy Abdolla Gúl elordadaǵy «Nur-Orda» halyqaralyq qazaq-túrik lıtseıine barǵan kezde málim etken. «Alash aınasy» gazetiniń habarlaýynsha, bilim oshaǵyn aralap kórgen Túrkııa Prezıdenti Qazaqstan basshysynyń búkil túrki dúnıesi úshin atqaryp otyrǵan jumysyn joǵary baǵalaǵan. «Qazaqstan Prezıdenti Nursultan Nazarbaevtyń kúlli túrki álemi úshin jasaǵan jumystaryna rızashylyǵymyzdy bildire otyryp, biz Ankarada qurmetti Nursultan Nazarbaevqa eskertkish ornatpaqpyz», degen A.Gúl.

«Ólgen kıikterdi sanaýdan basqa amaldyń qalmaǵany ma?». «Alash aınasy» gazetindegi osy taqyryppen berilgen maqalaǵa Batys Qazaqstan oblysynda kıikterdiń jappaı ólýi arqaý bolǵan. «Keshe qyrylǵan aqbókender qatarynyń 12 myńǵa jetkeni málim boldy», dep jazady basylym. Jazylǵan jaıttyń egjeı-tegjeıin gazettiń beısenbilik nómirinen oqı alasyzdar.

«Dombyramyz - araq, Abaıymyz - nasybaı, rámizimiz - ishkıim bolyp júr. Ulttyq qundylyqtaryn qasterleıtin eldiń rámizi kindikten tómen túspes edi... «naǵyz qazaq qazaq emes, naǵyz qazaq - dombyra» dep áspettep júrgen ulttyq aspabymyzdyń aşysýdyń ydysyna aınalǵany nesi? «Qalyń elim, qazaǵym, qaıran jurtym» dep qazaǵynyń joǵyn joqtaǵan Abaı atamyz ýaqyt óte kele urpaǵynyń nasybaı syrtyna atyn bererin oılady ma eken? Namysy, rýhy bar eldiń ulttyq qundylyǵy bulaı aıaqasty bolmaýy kerek edi ǵoı», dep jazady «Alash aınasy» gazeti. Bul másele basylymnyń búgingi nómirinde «Namysymyzdy qorǵaýǵa da zań kerek pe?» degen taqyryppen jarııalanǵan. Sonymen qatar maqalada kóterilgen jaıttarǵa oraı bilikti mamandardyń da pikirleri berilgen.

***

«Aıqyn» gazetiniń jazýynsha, keshe Memleket basshysy Nursultan Nazarbaevtyń tóraǵalyǵymen qaýipsizdik keńesiniń kezekti otyrysy ótti. Bul jolǵy jıynǵa qazirgi kezdegi eń bir kókeıtesti problemalar - Qazaq eli júrgizetin kóshi-qon jáne demografııalyq saıasatty jetildirý máseleler shyǵarylǵan. «Qaýipsizdik keńesiniń músheleri, sondaı-aq dinı ekstremızmge qarsy turýǵa baǵyttalǵan is-sharalar jaıyn da talqyǵa saldy», dep jazady basylym. Alqaly jıynda kóterilgen jaıttar tóńireginde keńirek basylymnyń búgingi nómirindegi «Memleket endi demografııaǵa basymdyq beredi» degen maqaladan oqyp bilesizder.

«Elbasy Nursultan Nazarbaev pen Túrkııa Prezıdenti Abdýlla Gúl «KADEH-2010» qarý jaraq jáne áskerı-tehnıkalyq múlikterdiń birinshi halyqaralyq kórmesiniń ashylýyna qatysty», dep jazady «Aıqyn» gazeti. Basylymnyń baıandaýynsha ashylý rásiminen soń kórmeni shamaly aralaǵan eki eldiń basshylary qazaqstandyq armııa jabdyqtalǵan, nebir qıyn jerlerden óte alatyn avtokólik tehnıkalarynyń úlgilerimen tanysqan. «Prezıdentter kórmege keldi» degen taqyryppen berilgen maqalany egjeı-tegjeıli oqyǵyńyz kelse gazettiń beısenbilik nómirine nazar aýdaryńyz.

Aǵymdaǵy jyly qazaqtyń ǵulama ǵalymy, aǵartýshy-demokrat, shyǵystanýshy Shoqan Ýálıhanovtyń týǵanyna - 175 jyl. Osydan 3 jyl buryn Mádenı saıasat jáne ónertaný ınstıtýtynyń dırektory Erlan Saırov pen ir top shoqantanýshy ǵalymdardyń bastamasymen Shoqannyń tolyq shyǵarmalar jınaǵyn qazaqshaǵa aýdarý jumystary bastalǵan edi. «Aıqyn» gazetiniń búgingi sanynda ǵulama ǵalymnyń tuńǵysh ret tolyqtaı qazaq tilinde shyqqaly jatqan 6 tomdyq jınaǵy jaıly elimizdiń saıasattanýshylary men tarıhshylary oı bólisken. Oı-pikirler «Biz Shoqandy qanshalyqty tanydyq?» degen taqyryp astyna toptastyrylǵan.

***

«Nur Astana» gazetinde Kólik jine kommýnıkatsııa mınıstrligi Azamattyq avıatsııa komıtetiniń tóraǵasy Rádilbek Ábımoldamen aradaǵy suhbat «Elimizde bilikti ushqyshtar jetispeıdi» degen taqyryppen berildi. Basylym tilshisiniń barlyq saýaldaryna tuşymdy jaýap bergen ol avıatsııa kadrlaryn daıarlaý máselesine qatysty suraqqa «bul eń bir túıini sheshilmegen másele. Búgingi tańda Qazaqstanda bir ǵana joǵary oqý orny - Almatydaǵy azamattyq avıatsııa akademııasy bar. Ókinishke qaraı, bul oqý orny zamanaýı talaptarǵa jaýap bermeıdi. Akademııa túlekteri eskirgen, burynǵy keńestik baǵdarlama negizinde oqytylyp, shyǵarylady», depti.

Osy basylymda «Stalındik zulmat: azaly derekter» degen taqyryppen saıası qýǵyn-súrgin jyldaryndaǵy naqty derekter berilgen. Máselen, «Karlag» - Qaraǵandy eńbekpen túzeý lageri - Gýlag arhıpelagyndaǵy eń iri azap lageri. 1931-1956 jylǵa deıin osylaı ataldy. Eń alǵash 1932 jyly munda 22 myń adam otyrsa, sonyń 87 paıyzy qazaqtar bolǵan.

***

«Astana aqshamy» gazetiniń jazýynsha, L.Gýmılev atyndaǵy Eýrazııa ulttyq ýnıversıtetiniń resmı veb-saıty maýsym aıynan bastap 9 tilde jumys istemek. Buǵan deıin qazaq, orys jáne aǵylshyn tilderinde nsuqalary bar saıt endi qytaı, túrik, arab, ıspan, frantsýz, nemis tilderindegi bettermen tolyǵa túspek

Osy basylymnyń dástúrli «Áleýmet saýaly - ákim jaýaby» aıdarynda qala basshysy Imanǵalı Tasmaǵambetov elordalyqtardyń ózderin tolǵandyrǵan saýaldaryna gazet beti arqyly tuşymdy jaýap bergen.

***

«Keshe Úkimet úıinde QR Premer-Mınıstri Kárim Másimov Yung's Enterprise Holdings kompanııasynyń basqarma tóraǵasy Larrı ıÝng bastaǵan gonkongtyq ınvestorlar delegatsııasyn qabyldady», dep jazady «Kazahstanskaıa pravda» gazeti Úkimet basshysynyń baspasóz qyzmetine silteme jasap. Kezdesý barysynda birlesken ınvestıtsııalyq bastamalar men Qazaqstan Respýblıkasy ekonomıkasynyń ártúrli salalaryndaǵy naqty jobalardy júzege asyrý máseleleri talqylandy. K.Másimov Qazaqstan Úkimeti ózara tıimdi negizde gonkongtyq ınvestorlarǵa qajetti kómek kórsetýge daıyn ekenin qýattady. Kezdesý sońynda taraptar Qazaqstan men Gonkong arasyndaǵy ekijaqty yntymaqastyqtyń odan ári damıtynyna senim bildirdi.