Túrkııada eko-meshit boı kóteretin boldy
ASTANA. 3 aqpan. QazAqparat - Túrikterdiń Býrsa provıntsııasyndaǵy Nılıýfer aýdanynda salynatyn meshittiń qurylysy 2015 jyly aıaqtalady. Bul meshittiń ereksheligi - jańartylatyn energııa kózin tutynatyn bolady. Bul jaıynda Hurriyet Daily News habar taratty.
Sáýletshiler ózderi oılap tapqan bul jobanyń qorshaǵan ortany qorǵaýda ózgelerge de úlgi bolatynyna senimdi.
muslim.kz saıtynyń jazýynsha, meshittiń shatyryna kún paneli men munaralaryna jel týrbınalary ornatylǵan. Budan ózge de ekologııalyq artyqshylyqtary bar meshit jamaǵattyń qajettiligine jaraıtyn erigen qar sýy men jaýyn sýyn jınaıtyn júıesimen de erekshelenetin bolady.
Meshitten artylǵan elektr qýaty memleketke satylady. «Meshitte 120 kVt elektr qýaty óndirilse, onyń tek 50 kVtyn ǵana paıdalanady. Qalǵany memleketke satylady», - dedi sáýletshi Chelık Erengezgın (Çelik Erengezgin).
Onyń aıtýynsha, túrikterdiń din isteri jónindegi basqarmasy bul jobaǵa oń qabaq tanytyp otyrǵan kórinedi.
iRES Energy Atesh Ýgýrel (Ateş Uğurel) kompanııasynyń negizin qalaýshylardyń aıtýynsha, túrik meshitteriniń joq degende 80 paıyzy tabıǵı qýat kózderin óndirýge den qoısa, eldi 400 megavatt elektr qýatymen qamtamasyz ete alady eken.
Energetıka naryǵyn retteý jónindegi ulttyq basqarmanyń málimetine qaraǵanda, bul jobaǵa tek meshitter ǵana emes, sonymen birge, jekemenshik oqý oryndary men sport keshenderi de qyzyǵýshylyq tanytyp otyr.
