Túrkııada dúnıejúzi qazaqtarynyń kishi quryltaıy ótti

YSTANBUL. QazAqparat - Qazaqstan Táýelsizdiginiń 30 jyldyǵy aıasynda Ystanbulda s qaýymdastyǵynyń «Jahandaný órkenıetindegi qazaq álemi» atty Kishi quryltaıy ótti. Bul týraly QazAqparat Qaýymdastyqqa silteme jasap habarlaıdy.

Alystaǵy aǵaıynnyń alqaly májilisi bastalmas buryn jergilikti bılik ókilderi men Kishi quryltaı delegattary jáne qala turǵyndary túrik pen qazaqqa ortaq tulǵa Mustafa Óztúrik atyndaǵy saıabaqtyń ashylý saltanatyna qatysty.

Saıabaq Qazaqstannyń Túrkııadaǵy Elshiligi men Ystanbuldaǵy Bas konsýldyǵynyń uıytqy bolýymen ashylyp otyr. Ashylýda Ystanbul qalasynyń 800 myń halqy bar Baǵjylar aýdanynyń ákimi Lokman Chaǵyryjy, Qazaqstan Respýblıkasynyń Ystanbuldaǵy Bas konsýly Álim Baıel, Dúnıejúzi qazaqtarynyń qaýymdastyǵy Tóraǵasynyń birinshi orynbasary Zaýytbek Turysbekov sóz sóılep, dańqty sportshynyń eskertkishi ornatylǵan saıabaqtyń lentasyn kesti. Іs-sharaǵa M. Óztúriktiń qaryndasy Perıhan men Germanııada turatyn qyzy Neslıhan da qatysty.

Kishi quryltaı jumysyna Túrkııa jáne Eýropadaǵy qazaq dıasporasynyń ókilderi qatysty. Quryltaıdyń qorytyndysynda Qazaqstan Táýelsizdiginiń 30 jyldyǵyna oraı qandastardyń Úndeýi qabyldandy. Sondaı-aq, birqatar qatysýshylar Dúnıejúzi qazaqtarynyń qaýymdastyǵy Tóraǵasynyń birinshi orynbasary Z. Turysbekovtyń buıryǵymen «Kishi quryltaı» tósbelgisimen marapattaldy.

Quryltaı aıasynda dıasporanyń jastary úshin qazaqstandyq joǵarǵy oqý oryndarynyń «Bilim kórmesi» uıymdastyryldy. Onda Ál-Farabı atyndaǵy Qazaq ulttyq ýnıversıteti, L.N. Gýmılev atyndaǵy Eýrazııa ulttyq ýnıversıteti, Halyqaralyq Taraz ınnovatsııalyq-gýmanıtarlyq ýnıversıteti ókilderi atalǵan oqý oryndary jóninde aqparattyq tanystyrylymdar jasap, syrttaǵy jastardy arnaıy bólinetin kvota sheńberinde oqýǵa shaqyrdy.

Sharalar legi Baǵjylar aýdandyq mádenıet ortalyǵynda jalǵasty. Onda qala turǵyndary men qandastardyń nazaryna Qazaqstan Táýelsizdiginiń 30 jyldyǵyna arnalǵan «Altyn tamyrly Atajurt» kórmesi usynyldy. Artynsha osy jerde Táttimbet atyndaǵy akademııalyq qazaq halyq aspaptar orkestri gala-kontsert berdi. Mýzykalyq kesh kórermenniń ystyq iltıpatyna bólenip, úlken qoshemetke ıe boldy. Sharanyń sońynda Z. Turysbekov qonaqtarǵa qazaqtyń shapanyn japsa, Á. Baıel Táýelsizdiktiń 30 jyldyǵyna arnap basylǵan kúmis estelik monetalardy syıǵa tartty.

Quryltaı sheńberinde Jambyl oblysynyń ókilderi Mustafa Óztúrik saıabaǵynyń ashylýynda óner kórsetse, «Altyn tamyrly Atajurt» jetistikter kórmesin Aqmola oblysy ákeldi. Al Táttimbet atyndaǵy orkestrdiń gala-kontsertin Qaraǵandy oblysy uıymdastyrdy.

Kishi quryltaı jyl saıyn ár túrli elderde ótip otyrady. Kelesi jyly Nur-Sultan qalasynda Dúnıejúzi qazaqtarynyń Uly quryltaıyn ótkizý josparlanýda.