Túrkııada drondarǵa arnalǵan áýe dálizderi ashylady
ASTANA. KAZINFORM — Jańa júıe drondar arqyly júkterdi, medıtsınalyq buıymdar men ónerkásip ónimderin ózdiginen jetkizýge múmkindik beredi, dep habarlaıdy Kazinform agenttiginiń Ankaradaǵy menshikti tilshisi.
Túrkııada drondardyń uzaq qashyqtyqqa avtonomdy ushýyna arnalǵan arnaıy áýe dálizderin ashýdyń quqyqtyq jáne tehnıkalyq negizi ázirlenip jatyr. Bul týraly eldiń kólik jáne ınfraqurylym mınıstri Abdýlkadır Ýraloǵlý málimdedi.
Joba boıynsha «drondarǵa arnalǵan avtomagıstraldar», ıaǵnı ushqyshsyz apparattar operatordyń tikeleı kórý aımaǵynan tys jerde de usha alatyn tsıfrlyq áýe baǵyttary ashylady. Olardy qurýdyń quqyqtyq negizi Túrkııanyń Azamattyq avıatsııa bas basqarmasy 2026 jylǵy 30 shildede jarııalaǵan ushqyshsyz avıatsııa júıelerin paıdalaný jónindegi jańa nusqaýlyqta (SHT-İHA) bekitilgen.
Mınıstrdiń aıtýynsha, áýe dálizderiniń shekarasy, kirý jáne shyǵý núkteleri, ushý baǵyttary, ótkizý múmkindigi men apparattar arasyndaǵy eń az araqashyqtyq tsıfrlyq formatta belgilenedi. Bul aqparat ushqyshsyz apparattardyń áýe qozǵalysyn baqylaý jáne basqarýdyń biryńǵaı platformasynda (İHATTYS) jarııalanady. Drondardyń baǵdarlamalyq jasaqtamasy qajetti derekterdi avtomatty túrde alyp, belgilengen talaptarǵa saı ushý baǵytyn retteıdi.
Marshrýttar JI tehnologııalary arqyly josparlanady. Qajet bolǵan jaǵdaıda júıe drondardyń qozǵalys baǵytyn ózgertip, ushýǵa tyıym salynǵan aımaqtardy belgileı alady, apparattardy qonýǵa baǵyttaıdy nemese reısti tolyq toqtatady. Baılanys úzilgen jaǵdaıda drondar eldi mekenderdiń ústinen ushpaı, aldyn ala belgilengen qaýipsiz aımaqtarǵa ózdiginen baǵyt alady.
Jańa ınfraqurylym negizinen logıstıka jáne medıtsına salasynda qoldanylady. Atap aıtqanda, drondar qalalar, logıstıkalyq ortalyqtar men kásiporyndar arasynda júk jetkizýge, sondaı-aq aýrýhanalarǵa donorlyq qan, dári-dármek, vaktsına men medıtsınalyq synamalardy tasymaldaýǵa jumyldyrylady. Budan bólek bul júıe araldar men qysta qatynaý qıyndaıtyn eldi mekenderdi qajetti júktermen qamtamasyz etýge jol ashady.
Sonymen qatar áýe dálizderi ónerkásip oryndary, óndiristik aımaqtar men porttar arasynda qosalqy bólshekter jetkizýge paıdalanylady. Buǵan qosa elektr berý jelilerin, qubyrlardy, temirjol jáne avtomobıl joldaryn qashyqtan baqylaýǵa múmkindik beredi.
Aıta keteıik, bul áýe dálizderi áýesqoı maqsattaǵy ushýlarǵa arnalmaǵan. Drondardy tek P2 sanatyndaǵy lıtsenzııasy bar, Azamattyq avıatsııa bas basqarmasynan ruqsat alǵan jáne ýákiletti uıymdardyń atynan jumys isteıtin pılottar basqara alady. Ushqyshsyz apparattar tirkelip, qashyqtan sáıkestendirý jáne ushý aýmaǵyn shekteý júıelerimen, sondaı-aq tıisti baǵdarlamalyq sertıfıkattarmen jabdyqtalýy kerek. Árbir ushý aldynda İHATTYS platformasy arqyly aldyn ala habarlama jiberý talap etiledi.
Ýraloǵlýdyń aıtýynsha, tsıfrlyq áýe baǵyttaryn engizý ózdiginen júzege asatyn júk tasymalynyń jańa múmkindikterin ashyp, jol qatynasyna táýelsiz kólik júıesin qalyptastyrýǵa negiz bolady.
Buǵan deıin Túrkııada dron paıdalanýshylary men osy saladaǵy tehnıka sany aıtarlyqtaı artqanyn jazǵan edik. Azamattyq avıatsııa bas basqarmasynyń 2025 jylǵy esebine sáıkes, drondardy basqarýǵa berilgen qoldanystaǵy lıtsenzııalar sany 1,6 mıllıonnan asqan.
