Túrkııada dron paıdalanýshylarynyń sany artty
ASTANA. KAZINFORM – Túrkııada ushqyshsyz ushý apparattary salasynda paıdalanýshylar men tehnıka sanynyń aıtarlyqtaı óskeni baıqaldy. Azamattyq avıatsııa Bas basqarmasynyń 2025 jylǵy esebine sáıkes, dron ushqyshtary lıtsenzııalarynyń sany 1,6 mln-nan asty, dep habarlaıdy Kazinform agenttiginiń Ankaradaǵy menshikti tilshisi.
Qujatta sondaı-aq 2025 jyldyń sońyna qaraı satýǵa jáne paıdalanýǵa daıyn drondar sany 76 myń birlikten asatyny atap ótilgen. Bul rette Túrkııa bıligi eldiń ushqyshsyz ushý apparattaryn paıdalaný salasynda ornyn nyǵaıtý úshin ınfraqurylym men navıgatsııalyq júıelerdi damytý jumystaryn jalǵastyryp keledi.
Azamattyq avıatsııa Bas basqarmasynyń bas dırektory Kemal ıÝksektiń málimdeýinshe, drondardy paıdalanýdyń artýymen baılanysty táýekelderdi ushqyshsyz ushý apparattaryn baqylaý jáne basqarýdyń jańa júıesiniń (IHATTYS) kómegimen rettelip otyr. Onyń aıtýynsha, júıe salaǵa «aıtarlyqtaı ósimge serpin berdi».
IHATTYS jobasy eldegi dronmen baılanysty barlyq operatsııalardy apparattyń ózinde qosymsha jabdyqty ornatý qajettiliginsiz baqylaýǵa baǵyttalǵan. Júıeni memlekettik azamattyq avıatsııa organdary basqara alady.
Qazirgi ýaqytta ushqyshsyz ushý apparattaryn óndirýshiler men ımporttaýshylar júıemen tehnıkalyq ıntegratsııany jalǵastyryp otyr. Ony tolyq iske qosýdyń quqyqtyq negizi áli de pysyqtalý ústinde.
Osyǵan deıin Túrkııa bıligi men qorǵanys-ónerkásip kesheni ókilderi «SAHA 2026» kórmesinen túsetin qarajatty el boıynsha dron óndirisi men oqytý jelisin keńeıtýge baǵyttaýdy josparlap otyrǵany habarlandy.