Túrkııada dombyra kúni atap ótildi
Ankarada da kúı shertilip, án shyrqalyp qazaqtyń ulttyq aspabynyń múmkindigine álem jurtyn tánti etýde. Tipti Túrkııa prezıdentiniń rezıdentsııasynda merekelik dýmandy kesh uıymdastyryldy.
Uly dala sazy Túrkııa rezıdentsııasyn jańǵyrtty. Prezıdent ákimshiligi janyndaǵy Ulttyq kitaphananyń saltanat saraıynda 50 dombyrashynyń qatysýymen merekelik kesh ótti.
Qazaqstannyń Túrkııadaǵy elshiliginiń uıytqysymen ótken is-sharany saıasatkerler, qoǵamdyq qaıratkerler, sheteldik dıplomatııa mıssııa ókilderi men qala turǵyndary men qonaqtary tamashalady. Rýhty kóteretin kúılerdiń sanynda shek joq. Baba aspap úni kúı bolyp tógilip, án bolyp qalyqtady.
Merekelik keshtiń alqısasy Qurmanǵazynyń asyl muralarynyń biri «Balbyraýyn» kúıimen bastaldy. Túrkııanyń shartarabynan bas qosqan dombyrashylardy 4 aı boıy Qazaqstannyń mádenıet qaıratkeri Elmıra Eskendirqyzy Shenduran daıyndapty.
Orkestr quramynda qazaq-túrik mýzykanttarynan bólek tatar, noǵaı, japon halqynyń ókilderi de bar. Qazaqstan jáne Mońǵolııanyń eńbek sińirgen ártisi Merýesh Bashaı «Ágýgaı dombyra» jáne «Dombyrasyz sán qaıda» ánin shyrqady. Túrkııada qazaqtyń qasıetti quralyn dáriptep júrgen Shámshigúl Júsipova men túrik mýzykanty Sedat Solakoǵlu qazaq-túrik áıgili áýenderinen poppýrı shertti.
Sondaı-aq Túrki dúnıesi orkestriniń mýzykanty, belgili kompozıtor Irfan Gúrdal Qorqyt Ataǵa arnalǵan týyndysyn oryndady. Bıylǵy Ulttyq dombyra kúni Túrkııada karantın talaptary jeńildegendikten be merekelik sharany tamashalaýǵa jınalǵandardyń qarasy kóp boldy. Kúmbirlegen dombyrany tamsanyp tyńdaǵan túrik jurty aqjarma tilekterin bildirdi.
«Keremet kún. Bizge de juǵysty bolsyn. Elimizde de dombyra kúni sekildi basqa mýzykalyq aspaptarymyzdyń da meıramy belgilensin dep tileımin. Búgingi keshte ózimdi atajurtta sekildi sezindim», - túrik depýtaty Metın Gúndoǵdý.
«Dombyra áýeni bizdi tańǵajaıyp tabıǵatqa jeteledi. Anadolydaǵy saz aspabynyń atasy dombyra», - dedi turǵyn Zeınep Koshker.
Osyndaı is-sharalar arqyly Ortalyq Azııanyń áýeni Ystambulǵa, Ankaranyń úni Túrkistanǵa jetedi. Ulttyq aspapty jańǵyrtqan Ulttyq dombyra kúni túrik astanasynyń basqa jerlerinde toılanbaq. Bul jolǵy mádenı shara sý jańa Túrki tarıhy saıabaǵynda uıymdastyrylmaq. «Dombyra kúnin» atap ótý sharalary túrki elinde de dástúrge aınalyp, kelesi jyly da jalǵasyn tappaq.
Eske salsaq, qazaqstandyqtar 2018 jyldan beri shildeniń alǵashqy jeksenbisi qazaqtyń tól aspbynyń kúni retine toılanyp keledi.
