Túrkııada dinı uıymnyń taǵy bir jetekshisi ustaldy
ASTANA.KAZINFORM — Túrkııada qarjylyq qylmystarǵa qatysty is boıynsha «Fýrkan» qorynyń jetekshisi Alparslan Kýıtýl men onyń áıeli qamaýǵa alyndy, dep habarlaıdy Kazinform agenttiginiń Ankaradaǵy menshikti tilshisi.
«Fýrkan» dinı qorynyń jetekshisi Alparslan Kýıtýl men onyń jubaıyna aqsha jylystatý, alaıaqtyq jasaý, resmı qujattardy qoldan jasaý jáne salyq tóleýden jaltarý aıyptary taǵylyp otyr.
Polıtsııa reıd júrgizip, Kýıtýldy qosa alǵanda, 32 adamdy ustady. Keıingi kúnderi taǵy 24 kúdikti qolǵa tústi.
Birneshe kún boıy jaýap alynǵannan keıin Kýıtýl men onyń áıeli tergeý ızolıatoryna jiberildi. Keıin qordyń jaqtastary sot sheshimine narazylyq bildirip, ǵımarat aldyna jınaldy.
«Fýrkanǵa» qatysty is Túrkııada iri dinı uıymǵa baılanysty sońǵy ýaqytta júrgizilgen ekinshi tergeý boldy. Buǵan deıin bılik «Súleımenshiler» dinı qaýymyna qatysty qarjylyq operatsııa júrgizgen edi. Onyń jetekshisi Alıhan Kúrish te qarjylyq qylmys jasady degen aıyp boıynsha qamaýǵa alynǵan.
Tergeý nusqasy boıynsha, uıymmen baılanysty tulǵalar men kompanııalar shetelge 100 mıllıardtan astam túrik lırasy, ıaǵnı 2 mıllıard dollardan astam qarjy aýdarýy múmkin.
Buǵan deıin tergeýshiler «Súleımenshilermen» baılanysty degen boljamdaǵy qarjylyq jáne baılanys jelisine qatysty jańa derekter anyqtaǵany habarlanǵan bolatyn.
Aıta ketelik Túrkııada iri dinı qaýymdastyq jetekshisiniń aǵasynan 200 keli altyn anyqtalǵan edi.
