Túrkııada dinı qundylyqtardy qorlaǵany úshin 4 adam ustaldy
ANKARA. KAZINFORM – Paıǵambar Muhammedke qatysty karıkatýra jarııalap, dinı qundylyqtardy qorlaǵany úshin Túrkııada tórt adam ustaldy, dep jazdy Anadoly agenttigi.
Eldiń ishki ister mınıstri Alı Ierlıkaıanyń málimetinshe, ustalǵandar arasynda satıralyq jýrnaldyń dırektory da bar.
Stambýldyń Bas prokýratýrasy «dinı qundylyqtardy kópshilik aldynda qorlaý» faktisi boıynsha bastaǵan tergeý aıasynda kúdiktiler ustalǵan.
Túrkııanyń syrtqy ister mınıstri Hakan Fıdan bul jarııalanymdy qatań aıyptap, ony «ázilmen búrkemelengen arsyz ári arandatýshy shabýyl» dep atady.
Mınıstrdiń aıtýynsha, bul áreket — dinge, kıeli uǵymdarǵa jáne ǵasyrlar boıy túrik halqy qadir tutyp kelgen negizgi qundylyqtarǵa qarsy óshpendilik negizindegi qylmystyń kórinisi.
— Mundaı qylmys jasap, qoǵam tynyshtyǵyna nuqsan keltirgender mindetti túrde sot aldynda jaýap beredi. Biz el ishinde de, shetelde de ıslamǵa jáne musylmandarǵa baǵyttalǵan óshpendilik pen jaýyzdyqtyń kez kelgen túrimen ymyrasyz kúres júrgizemiz, — dep málimdedi mınıstr.
26 maýsymda jarııalanǵan karıkatýrada Muhammed paıǵambar men Musa paıǵambar (Moıseı) beınelenip, olar qıraǵan qala ústinde qol alysqan túrde kórsetilgen. Karıkatýra Izraıl men Iran arasyndaǵy sońǵy qaqtyǵysqa meńzeý retinde usynylǵan.
Buǵan deıin Túrkııa Bosfor jáne Dardanell buǵazdary arqyly ótetin kemeler aqysyn taǵy da kótergenin jazǵan bolatynbyz.
