Túrkııada Demokratııa jáne ulttyq birlik kúni: el boıynsha eske alý sharalary ótip jatyr

Memlekettik tóńkeristiń aldyn alý áreketine 10 jyl tolýyna oraı el aýmaǵynda Ulttyq birlik sherýi uıymdastyrylyp, ol ortalyq alańdardaǵy eske alý rásimderimen aıaqtalady. Dástúrli túrde eń aýqymdy is-sharalar Ankara men Ystanbulda ótip jatyr.

Baǵdarlama aıasynda 2016 jylǵy 15 shildedegi oqıǵalarǵa arnalǵan kórmeler, eske alý sherýleri men mýltımedııalyq jobalar uıymdastyrylǵan.

Ankaradaǵy Ulttyq saıabaqta Túrkııa Prezıdenti Rejep Taııp Erdoǵannyń qatysýymen eske alý rásimi ótti. Ártúrli málimetke sáıkes, oǵan shamamen 20 myń adam qatysty.

– 15 shilde – memlekettik tóńkeris áreketiniń joly kesilgen tún ǵana emes. Bul – halqymyzdyń óz erkin, demokratııasy men táýelsizdigin janyn pıda ete otyryp qorǵaǵan, tarıhqa altyn árippen jazylǵan demokratııanyń uly jeńisi, – dedi Rejep Taııp Erdoǵan Demokratııa jáne ulttyq birlik kúnine oraı jarııalaǵan maqalasynda.

Mereıtoıǵa oraı Túrkııa Prezıdenti Ákimshiliginiń Kommýnıkatsııalar basqarmasy halyqaralyq medıa baǵdarlamasyn uıymdastyrdy. Onyń aıasynda Túrkııaǵa 21 elden 41 jýrnalıst shaqyrylǵan.

Sheteldik buqaralyq aqparat quraldarynyń ókilderi Ankara men Ystanbulda bolyp, 2016 jylǵy 15 shilde oqıǵalaryna qatysty tarıhı oryndardy aralaıdy jáne mereıtoılyq is-sharalarǵa qatysady.

Eske salaıyq, 2016 jylǵy 15 shildeden 16 shildege qaraǵan túni Túrkııada FETO terrorıstik uıymynyń músheleri qarýly memlekettik tóńkeris jasaýǵa árekettengen bolatyn.

Áskerı tóńkeris áreketine shamamen 9 myń áskerı qyzmetker qatysyp, 35 ushaq, 37 tikushaq, 74 tank, 246 brondy tehnıka, 4 myńǵa jýyq atys qarýy jáne úsh áskerı keme paıdalanyldy. Sol oqıǵalar saldarynan 253 adam qaza taýyp, 2 myńnan astam adam jaraqat aldy.

Buǵan deıin Túrkııada FETO isi boıynsha jappaı ustaý sharalary júrgiziletini habarlanǵan bolatyn.