Túrkııada DAISh-ke qarsy aýqymdy operatsııalar júrgizildi: 184 adam ustaldy

ASTANA. KAZINFORM – Keıingi eki aptada Túrkııa qaýipsizdik kúshteri eldiń 35 provıntsııasynda terrorızmge qarsy operatsııa júrgizdi, dep habarlaıdy Kazinform agenttiginiń Ankaradaǵy menshikti tilshisi.

Túrkııada halyqaralyq terrorıstik uıym «Islam memleketine» (DAISh – Qazaqstanda tyıym salynǵan uıym) qarsy birqatar aýqymdy operatsııa aıaqtaldy.

Eldiń Іshki ister mınıstrliginiń málimetinshe, operatsııalardy Bas polıtsııa basqarmasy, Terrorızmge qarsy kúres departamenti jáne Ulttyq barlaý uıymy (UBU) prokýratýra organdarymen jáne aımaqtyq polıtsııa departamentteriniń terrorızmge qarsy bólimshelerimen birlesip úılestirdi. Operatsııalar eki aptaǵa sozyldy jáne 35 provıntsııany qamtydy. Nátıjesinde DAISh-pen baılanysy jáne qarjylandyrýy bar degen kúdikpen 184 adam ustaldy.

Tergeýshilerdiń málimetinshe, ustalǵandar terrorıstik uıymnyń qyzmetine qatysqan, terrorızmge qatysty ister boıynsha izdeýde bolǵan nemese ekstremıstik uıymǵa qarjylyq qoldaý kórsetken bolýy múmkin.

Sot ustalǵandardyń keıbirine qatysty sheshim qabyldady: 22 kúdikti tutqyndaldy, 33-i sot baqylaýymen bosatyldy, al qalǵan kúdiktilerge qatysty is júrgizý jalǵasyp jatyr. 

Tintý kezinde qaýipsizdik kúshteri segiz tirkelmegen tapansha, bir ańshy myltyǵyn jáne uıymnyń qyzmetine qatysty kóptegen qujat pen tsıfrlyq materıaldardy tárkiledi. 

Túrkııa bıligi ekstremıstik toptarǵa qarsy operatsııalardy únemi júrgizip, terrorızmge qarsy kúres eldiń ulttyq qaýipsizdigin qamtamasyz etýdiń negizgi baǵyty bolyp qala beretinin atap ótedi.

Buǵan deıin Túrkııadaǵy quqyq qorǵaý organdary DAISh-ke qatysy bar degen kúdikpen 31 adamdy ustaǵan bolatyn.