Túrkııada «bloger muǵalimderdi» tekserý bastaldy
ASTANA. KAZINFORM — Túrkııanyń Ulttyq bilim mınıstrligi kásibı etıka normalaryna silteme jasaı otyryp muǵalimderdiń áleýmettik jelilerdegi belsendiligin baqylaýyn kúsheıtti, dep habarlaıdy Kazinform menshikti tilshisi.
Vedomstvo áleýmettik jelilerde belsendi jáne aıtarlyqtaı oqyrmany bar muǵalimderge qatysty tergeý bastady. Bul bastama azamattardyń jekelegen ınflıýenser-pedagogter kontentine kóńili tolmaýynan týyndady.
Belgili bolǵandaı, jekelegen oqytýshylardyń keıbir jarııalanymdary men beınematerıaldary muǵalimder qaýymdastyǵynyń múshelerine qoıylatyn kásibı jáne etıkalyq standarttarǵa sáıkes kelmeıdi. Mınıstrlik muǵalimderdiń qoǵamdyq tsıfrlyq keńistiktegi minez-qulqy oqýshylar úshin úlgi bolýy kerek ekenin atap ótti.
Budan basqa, Túrkııanyń «Pedagogıkalyq kásip týraly» zańyna sáıkes, bilim berý mekemelerindegi muǵalimder men ákimshilik qyzmetkerler oqýshylardyń sýretterin tek ata-analarynyń ruqsatymen ǵana bólise alady. Oqýshylarǵa nemese bilim berý protsesine qatysty aýdıo nemese beıne materıaldardy bólisý arqyly erejelerdi buzǵan qyzmetkerlerge sógis jarııalanýy múmkin. Tártiptik jaza muǵalimniń jeke isinde bes jyl boıy saqtalady.
Tekserýler kásibı etıka men qoldanystaǵy erejelerdiń saqtalýyn baǵalaýǵa baǵyttalǵan. Vedomstvo bul áleýmettik jelilerdegi belsendilikke tolyq tyıym salýdy bildirmeıtinin, alaıda pedagogtiń bilim berý mártebesi qosymsha mindettemeler júkteıtinin atap ótedi.
Budan buryn Túrkııa ótken jyly 180 mádenı jádigerin elge qaıtarǵanyn jazǵan edik.