Túrkııada bilim alyp jatqan qazaq jastary bastańǵy jasady
ASTANA. QazAqparat - Ankara qalasynda bilim alyp jatqan qazaq jastary Qazaqstannyń Túrkııa Respýblıkasyndaǵy Elshiliginiń qoldaýymen tabıǵat aıasynda bas qosty, dep habarlaıdy QazAqparat.
Elshiliktiń Feısbýktegi resmı paraqshasyndaǵy málimetterge qaraǵanda, sharaǵa Túrkııa astanasynda ornalasqan túgel derlik joǵary oqý oryndarynyń stýdentteri, magıstranttar men Ph.D doktoranttar jáne elshilik qyzmetkerleri qatysty.
Túrkııadaǵy qazaq jastarynyń bir-birimen jaqyn tanysýyna múmkindik týǵyzyp, ózara dostyq - joldastyq qatynastaryn arttyrý maqsatynda uıymdastyrylǵan bul sharaǵa Qazaqstannyń Túrkııadaǵy Elshisi Abzal Saparbekuly qatysyp, jastardyń bilimdi, tájirıbeli, kásibı maman bolýyna tilek bildirip, elimizdiń bedeli men jetistikterin óz deńgeılerinde tanytýǵa at salysýǵa shaqyrdy. Ankara ólkesiniń jasyl aımaǵy ‒ Gólbashy Mogan Parkinde bas qosqan qazaq jastary asyq oınaý, arqan tartys, t.b. ulttyq oıyndarda kúsh synasyp, basqa da fýtbol, voleıbol syndy sporttyq jarystarǵa qatysty.
«Qazaq jastarynyń mundaı dástúri aldaǵy ýaqytta da jalǵasa beretinin aıtqan Elshi oıyn jeńimpazdary men belsendi jastarǵa Qazaqstan Elshiliginiń arnaıy syılyqtaryn tapsyrdy. Elshimen erkin suhbat quryp, pikir almasý múmkindigine ıe bolǵan qazaq jastary da ózderine udaıy qoldaý bildirip, kómek kórsetkeni úshin Elshilikke arnaıy Alǵys hat tabystap, aldaǵy ýaqyttaǵy josparlarymen pikir bólisti», - delingen Feısbýktegi aqparatta.
