Túrkııada «bári ishinde» formatyn qaıta qaraý usynyldy
Túrkııa týrızm ındýstrııasy ókilderi qonaqúılerdegi týrıster qandaı taǵam men sýsynǵa tóleıtinin ózi tańdaıtyn «bári ishinde» (all inclusive) formatyn qaıta qaraýdy usyndy. Biraq qalyptasyp qalǵan jáne sheteldikter arasynda tanymal júıe saqtalady, dep atap ótti Jerorta teńizi qonaqúı jáne operatorlar qaýymdastyǵy basshysy Kaan Kavaloglý. Kazinform bul týraly TASS-qa silteme jasap habarlaıdy.
Turizm Gazetesi gazetinde jarııalanǵan kásipker pikirinshe, Túrkııada ekonomıkalyq jaǵdaı qıyndaǵandyqtan shyǵyn artqan, bul jaǵdaı týrısterge arnalǵan jańa qyzmet túrlerin jasaýǵa múmkindik beredi.
«Usynylyp otyrǵan «Qansha paıdalansań – sonsha tóle» ataýyna ıe bolǵan úlgi bárinen buryn all inclusive-tiń alkogolsiz nusqasyna uqsaıdy. Ol osy júıeniń bir bóligi bolady», - dedi Kavaloglý.
Túrkııada alkogolsiz all inclusive júıesi bar qonaqúıler jetkilikti. Biraq mundaı týrıstik ónim kópshilik arasynda tanymal emes jáne qalyptasqan júıege balama bola almaıdy, - dep habarlady Túrkııa Týrıstik agenttikter qaýymdastyǵy.
«Bul másele tańdaýǵa kelip tireledi, bireýler demalystyń halal túrin, endi biri dástúrli úlgisin qalaıdy. Týr satyp alyp jatqan adamda tańdaý quqyǵy bar», - dedi agenttikke pikir bildirýshi.
Týroperatorlardyń dereginshe, alkogolsiz all inclusive ádettegi týrlardan 7-10% arzan bolady. «Qansha paıdalansań – sonsha tóleısiń» formaty dástúrli paketterden qanshalyqty tıimdi bolatyny aıtylmaǵan.
