Túrkııada balasy mektepke baratyn ata-analarǵa úsh saǵatqa deıin demalys beriledi
ASTANA. KAZINFORM — 7-11 qyrkúıek aralyǵynda memlekettik mekemelerde jumys isteıtin ata-analarǵa balalaryn mektepke beıimdeý sharalaryna qatysýy úshin úsh saǵatqa deıin ákimshilik demalys beriledi. Bul týraly Kazinform-nyń Ankaradaǵy menshikti tilshisi habarlady.
Túrkııada mektepke deıingi daıarlyq synyptaryna, 1-synypqa jáne 5-synypqa baratyn balalardyń ata-analary jańa oqý jylynyń beıimdelý aptalyǵyna belsendirek qatysa alady.
Prezıdenttiń Bas hatshylyǵynan memlekettik mekemelerge joldanǵan sheshimge sáıkes, memlekettik sektorda jumys isteıtin ata-analardyń biri óz ótinishi boıynsha beıimdeý sabaqtary ótetin kúnderi úsh saǵatqa deıin ákimshilik demalys ala alady. Demalys ýaqyty balanyń bilim berý uıymyndaǵy sabaq kestesine sáıkes belgilenedi.
Beıimdeý sharalary 2026-2027 oqý jylyna daıyndyq aıasynda 7-11 qyrkúıek aralyǵynda ótedi. Onyń maqsaty — balalardyń mektep ortasyna jeńil beıimdelýine kómektesý, sondaı-aq otbasy men mektep arasyndaǵy yntymaqtastyqty nyǵaıtý.
Bul baǵdarlama «Otbasy jáne halyqtyń 10 jyly» saıasatynyń bir bóligi bolyp esepteledi. Alaıda ata-analardyń qatysýy mekteptegi alǵashqy aptamen ǵana shektelmeıdi. Oqý jyly boıy otbasylardyń qatysýy, balalardy damytýǵa baǵyttalǵan is-sharalar jáne konsýltatıvtik-psıhologııalyq qoldaý «Otbasymmen birge mektepke jol» baǵdarlamasy aıasynda júzege asyrylady.
Eske salaıyq, buǵan deıin Túrkııada jańa oqý jyly qarsańynda ata-analarǵa balalardy mektepke tasymaldaý úshin tek resmı tirkelgen jáne tekserýden ótken kólikterdi tańdaýǵa keńes berilgenin jazǵanbyz.
