Túrkııada balalardyń áleýmettik jeli men smartfon paıdalanýyna shekteý engiziledi
ASTANA.KAZINFORM - Túrkııa áleýmettik jeli qoldanýshylar jasyna shekteý qoıyp, 13 jasqa tolmaǵan balalardyń smartfon paıdalanýyna tyıym salmaqshy.
Bul bastama túrik bıliginiń kámeletke tolmaǵandardy tsıfrlyq tehnologııalardyń teris áserinen qorǵaý jáne olardyń ınternettegi qaýipsizdigin qamtamasyz etý jónindegi sharalarynyń biri.
Jańa zań bastamashylarynyń aıtýynsha, joba AQSh, Qytaı, Frantsııa jáne basqa elderde qoldanylǵan sátti shekteý mysaldaryn eskere otyryp, halyqaralyq tájirıbege negizdelgen. Bılik balalardyń fızıkalyq jáne psıhıkalyq densaýlyǵyna teris áser etetin kıberqorqytý men gadjetterdi shamadan tys paıdalanýdy, orynsyz aqparattardyń qoljetimdiligin qosa alǵanda, áleýmettik medıany erte paıdalanýmen baılanysty táýekelderdi barynsha azaıtýǵa tyrysady.
Jańa zań 13 jasqa tolmaǵan balalardyń tehnologııa paıdalanýyn shektep qana qoımaı, platformalardy jas talaptaryn oryndaýǵa jaýapty etedi degen boljam jasaldy. Kompanııalardan paıdalanýshylardyń jasyn tekserý jáne kámeletke tolmaǵandardyń jeke derekterin qorǵaýdy qamtamasyz etý tetikterin engizý talap etiledi.
Birqatar elderde mundaı tájirıbe qazirdiń ózinde bar. Mysaly, Frantsııada gadjetterge táýeldilikti azaıtý jáne sabaqta zeıindi shoǵyrlandyrý deńgeıin arttyrý úshin 15 jasqa deıingi balalarǵa mektepterde smartfon qoldanýǵa tyıym salynǵan. Qytaı balalardyń áleýmettik jeli paıdalanýyna qatań shekteý qoıdy. AQSh óz kezeginde áleýmettik platformalardy qoldanýshylardyń jasyn baqylaýdy kúsheıtetin zań jobalaryn belsendi túrde talqylap jatyr.
Álemdegi árbir alty eldiń biri mektepterde smartfon paıdalanýǵa zań nemese usynys boıynsha tyıym salǵan.
Sonymen qatar, Túrkııada balalar arasyndaǵy ınternetti paıdalaný 2024 jyly 91,3 paıyzdy qurap, rekordtyq kórsetkishke jetti. Bul kórsetkish óskeleń urpaq ómirindegi tsıfrlyq tehnologııalar róliniń artyp kele jatqanyn kórsetedi. Bul rette uldar arasynda ınternetti qoldanýshylardyń úlesi 92,2%, al qyzdar arasynda 90,3% qurady.
QazAqparat budan buryn Aýstralııada 16 jasqa tolmaǵan balalar úshin áleýmettik jelilerge tyıym salýdy zańdastyratynyn habarlaǵan bolatyn.