Túrkııada azyq-túlikten ýlaný jaǵdaıy jıilep barady
ASTANA. KAZINFORM — Túrkııanyń tórt provıntsııasynda jappaı azyq-túlikten ýlaný oqıǵasy tirkeldi, dep jazdy Kazinform agenttiginiń menshikti tilshisi.
Elde birden tórt óńirde tirkelgen ýlaný jaǵdaıynan keıin halyq alańdaýly. Birneshe kún ishinde 116 adam aýrýhanaǵa júgindi, olardyń basym bóliginde ıntoksıkatsııanyń tıptik belgileri anyqtalǵan.
Túrkııa Prezıdenti Rejep Taııp Erdoǵan bul máselege baılanysty taǵam qaýipsizdigine qatysty eń bolmashy nemquraılylyqqa jol berýge bolmaıtynyn málimdedi.
– El boıynsha júrgizilip jatqan tekserý sharalary aıasynda 2025 jyly 1 mln 103 myń azyq-túlik ónimderi boıynsha ınspektsııa júrgizildi. Erejeni buzǵan 25 750 kásiporynǵa jalpy somasy 2 mlrd 206 mln túrik lırasy kóleminde ákimshilik aıyppuldar salyndy, – dep atap ótti Erdoǵan.
Stambuldyń Fatıh aýdanyndaǵy bir otbasynyń tórt múshesi tamaqqa ýlanyp qaıtys bolǵan. Osy qaıǵyly oqıǵadan keıin jappaı gospıtalızatsııa týraly habar qoǵamdaǵy alańdaýshylyqty kúsheıtti.
Dolaıly aýylynda úılený toıyndaǵy qonaqtarǵa berilgen taýyq qosylǵan palaýdan keıin 65 adam qatty álsirep, ishi aýyryp, júregi aınyǵan ári qusqan. Zardap shekkender jergilikti aýrýhanalarǵa jetkizildi. Dárigerler olardyń taǵamnan ýlanǵanyn rastady. Barlyq patsıentter emdelip, úıine shyǵaryldy.
Nıgde provıntsııasynda birneshe adam pastyrma jegennen keıin ózin nashar sezingen. Keıin olarǵa ýlaný kúdigimen taǵy úsh adam qosyldy. Mamandar saýda núktelerinde tekseris bastap, ónimderden synamalar aldy. Eki patsıent dárigerler baqylaýynda qala bermek.
Kastamoný provıntsııasynda as berý rásiminen keıin (qonaqtarǵa taýyq qosylǵan palaý jáne aıran usynylǵan) 43 adam medıtsınalyq kómekke júgindi. 33 patsıent alǵashqy kómekten keıin úıine jiberildi, al 10 adam – onyń ishinde bir bala – aýrýhanada qaldy.
Býrsa qalasynda dúkennen satyp alynǵan taýyq etimen daıyndalǵan keshki astan keıin úsh adam densaýlyǵynyń kúrt nasharlaǵanyn aıtyp shaǵymdandy. Olar aýrýhanaǵa jetkizildi, jaǵdaılary turaqty dep baǵalanǵan. Polıtsııa men sanıtarlyq qyzmetter atalǵan ónimge tekseris bastady.
Jergilikti bıliktiń málimetinshe, barlyq jaǵdaı boıynsha tergeý júrip jatyr, zardap shekkenderdiń basym kópshiliginiń jaǵdaıy qanaǵattanarlyq. Ómirine qaýip tóndirmese de, bul oqıǵalar eldegi azyq-túlik sapasyn baqylaý máselesine qaıta nazar aýdartty.
Buǵan deıin Stambul bıligi Fatıh aýdanynda bir otbasynyń úsh múshesiniń qaıǵyly ólimine baılanysty qonaqúıdi jabý týraly sheshim qabyldaǵan edi. Keıinirek aýrýhanaǵa túsken otbasy basshysy da qaıtys bolǵany belgili boldy.